ქართული ღვინის მწარმოებლებმა აზიის ბაზარზე პირველი მნიშვნელოვანი გამარჯვება მოიპოვეს. ჰონგ-კონგის ღვინისა და სპირტიანი სასმელების საერთაშორისო კონკურსში პირველად მონაწილე ქართულმა ღვინოებმა და სპირტიანი სასმელებმა გრან-პრი, 2 ოქროს, 1 ვერცხლის და 13 ბრინჯაოს მედალი დაიმსახურა. გრან-პრი და ოქროს მედალი "ქინძმარაულის მარანის" მუხაში დაძველებულმა საფერავმა მიიღო. ასევე ოქროს მედლით დაჯილდოვდა ‘შატო მუხრანის" ჭაჭა.
HKTDC ალკოჰოლური სასმელების აზიის ყველაზე მასშტაბური და პრესტიჟული გამოფენაა, სადაც ყოველწლიურად 700-მდე მონაწილე და 14,000-ზე მეტი მყიდველი იყრის თავს. HKIWSC ასევე მნიშვნელოვანი კონკურსია, სადაც წელიწადში 1500-ზე მეტი განაცხადი შედის მთელი მსოფლიოდან. HKIWSC შედეგები ყოველწლიურად ჰონგ-კონგის გამოფენის პირველ დღეს ცხადდება, რაც უზრუნველყოფს გამარჯვებული ბრენდების სტენდებთან მეტი დაინტერესებული ტრეიდერის, იმპორტიორის მოზიდვას და, რაც მთავარია, რეგიონის მასშტაბით უფასო პოპულარიზაციას. ამ ორ ღონისძიებაში ქართული კომპანიების მონაწილეობა საინვესტიციო სააგენტოს ექსპორტის ხელშეწყობის ინიციატივით და თანადაფინანსებით მოხდა, საორგანიზაციო საკითხებში კი სააგენტოს ქართული ღვინის ასოციაცია დაეხმარა.
სააგენტოს ექსპორტის ხელშეწყობის სამსახურის მიერ კონკურსზე წარდგენილი იქნა ღვინის და სპირტიანი სასმელის 37 სახეობა. ნიმუშების გაგზავნა ჰონგ-კონგის ერთ-ერთი ყველაზე გავლენიანი საკონსულტაციო კომპანიის რჩევების საფუძველზე მოხდა, რომელიც ასევე უზრუნველყოფს ჰონგ-კონგში ქართულ სტენდთან ტრეიდერების ჯგუფის მობილიზებას და ნოემბერში ქართული სასმელების გამოფენა-ფორუმზე თბილისში 40-მდე აზიელი ტრეიდერის ჩამოყვანას - ღონისძიება საინვესტიციო სააგენტოს ორგანიზებით და ეკონომიკისა და მდგრადი განვითარების სამინისტროს პატრონაჟით ხორციელდება.
აღსანიშნავია, რომ ქართული ღვინის წარმატება დამსწრე საზოგადოებისთვის განსაკუთრებით შთამბეჭდავი აღმოჩნდა იმის ფონზე, რომ აშშ-ს წილად ხვდა ჯამში ორი, იტალიას კი ერთი ოქროს მედალი. ოქროს მედლების რაოდენობის მიხედვით ღვინის კატეგორიაში ავსტრალია (12) და საფრანგეთი (5) ლიდერობენ. სპირტიან სასმელებში შოტლანდიას 10-იდან 5, მექსიკას 2, ხოლო საქართველოს (ჭაჭა), საფრანგეთსა და შვედეთს თითო ოქრო მედალი ერგოთ. შესაბამისად, საქართველო სპირტიანი სასმელების ნომინაციაში საუკეთესო ათულში მოხვდა.
ასეთ კონკურსზე ქართული პროდუქციის წარმატება უნიკალური შანსია აზიის ბაზარზე ქართული ღვინის დამკვიდრებისთვის, რადგან ამ დარგში ჰონგ-კონგი ჩინეთის ბაზარს უახლეს ტრენდებს კარნახობს. საინვესტიციო სააგენტოს ინიციატივით გამარჯვებული ღვინის ბრენდები პოპულარულ iPhone-აპლიკაციაში მოხვდებიან, რომლითაც ჰონგკონგელი ღვინის მოყვარულები რესტორნებში სასმელის შეკვეთის დროს სარგებლობენ.
კონკურსში გამარჯვებული პროდუქცია ავტომატურად სარგებლობს დიდი მოთხოვნით ჩინეთის, იაპონიის, ტაივანის და აზიის სხვა ქვეყნების ბაზრებზედაც.
