ჰონგ-კონგის ღვინისა და სპირტიანი სასმელების საერთაშორისო კონკურსის გრან-პრის მფლობელი ქართული კომპანიის "ქინძმარაულის მარანის" მუხის კასრში დაძველებული "საფერავი" გახდა.
2011 წლის კონკურსი პირველი იყო ქართული სასმელების მწარმოებლებისთვის. საინვესტიციო სააგენტოს ექსპორტის ხელშეწყობის სამსახურის მიერ 37 ღვინის და სპირტიანი სასმელის სახეობა იყო წარდგენილი. ნიმუშების გაგზავნა ჰონგ-კონგის ერთ-ერთი ყველაზე გავლენიანი ღვინის საკონსულტაციო კომპანიის რჩევების საფუძველზე მოხდა.
კონკურსში სააგენტოს წილობრივი დაფინანსებით შვიდი ქართული კომპანია მონაწილეობდა: "ბაგრატიონი", "სარაჯიშვილი", "თბილღვინო", "შატო მუხრანი", "კახური ტრადიციული მეღვინეობა", "ხარება" და "კორპორაცია ქართული ღვინო". კონკურსის და გამოფენის საორგანიზაციო საკითხები ქართული ღვინის ასოციაციის მეშვეობით გადაწყდა.
ჰონგ-კონგის საერთაშორისო ღვინისა და სპირტიანი სასმელების კონკურსი წელიწადში 1500 განაცხადს იღებს. კონკურსი არის რეგიონში ყველაზე მნიშვნელოვანი მოვლენა ალკოჰოლური სასმელების წარმოსაჩენად. წარმატებული ბრენდები უფასო სარეკლამო კამპანიის გარდა სარგებლობენ დიდი მოთხოვნით ადგილობრივ ბაზარზე.
ჰონგ-კონგის მედიაში დიდი ინტერესი დაფიქსირდა საინვესტიციო სააგენტოს ეროვნულ სტენდთან დაკავშირებით, სადაც შვიდი ქართული კომპანია წარადგენდა პროდუქციას. სააგენტოს პარტნიორი ჰონგკონგური მარკეტინგული კომპანიის მიერ უკვე მოხდა იმ ბიზნესმენების ინფორმირება, რომელთაც ინტერესი გამოხატეს ქართული პროდუქციის მიმართ, მაგრამ ვერ ახერხებენ 25 ნოემბერს თბილისში ჩამოსვლას.
