დამწყები ბიზნესმენებისათვის ბიზნესგზამკვლევი "როგორ დავიწყო ბიზნესი" გამოვიდა, რომლის პრეზენტაციასაც ეკონომიკისა და მდგრადი განვითარების მინისტრი დაესწრო. გამოცემა მომზადდა საქართველოს ეკონომიკისა და მდგრადი განვითარების სამინისტროში გერმანიის საერთაშორისო თანამშრომლობის საზოგადოების (GIZ) მხარდაჭერით.
ღონისძიებაში მონაწილეობა მიიღეს გერმანიის საერთაშორისო თანამშრომლობის საზოგადოების (GIZ) რეგიონული დირექტორი მარტინ ომოლამ, ასევე საჯარო რეესტრის, თბილისის მერიის, სხვა სახელმწიფო უწყებებისა და კერძო სექტორის წარმომადგენლები.
როგორც ვერა ქობალიამ აღნიშნა, აშშ-სა და გერმანიაში ბიზნესის უდიდესი წილი სწორედ მცირე და საშუალო ბიზნესზე მოდის:
"ვფიქრობთ, საქართველოშიც ეკონომიკის ხერხემალი მცირე და საშუალო ბიზნესი უნდა იყოს და მოსახლეობა ამ სექტორში უნდა დასაქმდეს. გზამკვლევი დაინტერესებულ პირებს დაეხმარება ბიზნესის სფეროში საქმიანობის დაწყებაში - როგორი უნდა იყოს პირველი ნაბიჯები ამ მიმართულებით, სად მოიპოვოს დაფინანსება, როგორ დაწეროს ბიზნეს-გეგმა და ა.შ"- განაცხადა ქობალიამ.
ბიზნესგზამკვლევის შექმნის მიზანია ფართო საზოგადოებისათვის ინფორმაციის მიწოდება იმ სავალდებულო პროცედურებისა და მომსახურების შესახებ, რომელიც მათ შეუძლიათ მიიღონ სახელმწიფო უწყებებში, მათ საქვეუწყებო დაწესებულებსა და სხვადასხვა ორგანიზაციებში.
გზამკვლევი მოიცავს ბიზნესსაქმიანობასთან დაკავშირებული ფართო სპექტრს. კერძოდ, სად და როგორი ორგანიზაციულ-სამართლებრივი ფორმით არის შესაძლებელი საწარმოს რეგისტრაცია; რა სახის გადასახადებით იბეგრება მეწარმე და როგორია საგადასახადო განაკვეთები; რა სახის ლიცენზიები, ნებართვები, სერტიფიკატებია საჭირო ბიზნეს-საქმიანობისთვის; როგორ უნდა შედგეს ბიზნეს-გეგმა, რა ძირითად საკითხებს მოიცავს იგი და როგორია მისი ზოგადი სტრუქტურა; როგორ მოიძიოს მეწარმემ ფულადი რესურსები და მიიღოს ბიზნეს-კონსულტაციები. ასევე, რომელ უწყებას უნდა მიმართოს სხვადასხვა მომსახურების მისაღებად და რა პროცედურების გავლაა საჭირო.
გერმანიის საერთაშორისო თანამშრომლობის საზოგადოება (GIZ), გერმანიის ფედერალური მთავრობის დავალებით, მთელი მსოფლიოს მასშტაბით მრავალ ქვეყანაში მუშაობს, მათ შორის საქართველოში. იგი მხარს უჭერს გერმანიის ფედერალურ მთავრობას, განახორციელოს სხვადასხვა პროექტები საერთაშორისო თანამშრომლობისა და მდგრადი განვითარების უზრუნველყოფის მიზნით.