25-26 ნოემბერს ეროვნული საინვესტიციო სააგენტო აწყობს ქართული სასმელების გამოფენა-ფორუმს Trade With Georgia 2011 - Tradeshow and B2B Forum (TWG 2011).
ეროვნული საინვესტიციო სააგენტოს ინფორმაციით, ჯამში, საქართველოს ნოემბერში ეწვევა 40 დელეგატი აზიიდან (ჩინეთი, სინგაპური, იაპონია, ტაივანი), მათ შორის განსაკუთრებულად აღსანიშნავია სპეციალური სტუმრის, ლიზა პეროტი ბრაუნის ვიზიტი, რომელიც სინგაპურის ერთადერთი ღვინის მაგისტრია.
ასევე საქართველოში სპეციალური მისიით მოემგზავრება ჩინური "დეკანტერის" მთავარი რედაქტორი ლი იუსენი, რომელსაც სურს დეკემბრის გამოცემაში ხუთი გვერდი მიუძღვნას საქართველოს, როგორც ღვინის სამშობლოს. ეს საქართველოს შესახებ პირველი ვრცელი ჩინურენოვანი სტატია იქნება.
აღსანიშნავია, რომ ეროვნული საინვესტიციო სააგენტო, ექსპორტის ხელშეწყობის სამსახურის 2011 წლის პრიორიტეტის ფარგლებში ახორციელებს ქართული ალკოჰოლური სასმელების პოპულარიზაციას აზიის ბაზრებზე. განხორციელებული და დაგეგმილია ურთიერთდაკავშირებული და მიზანმიმართული ღონისძიებები, რომელთა შორის განსაკუთრებული მნიშვნელობა ჰონგ-კონგის ნოემბერში დაგეგმილ ღვინისა და ალკოჰოლური სასმელების კონკურსს და საერთაშორისო გამოფენას და თბილისის სასმელების გამოფენა-ფორუმს ენიჭება.