11-13 ნოემბერს, ბათუმში, აგრო-სასურსათო პროდუქციის და ტექნოლოგიების საერთაშორისო გამოფენა-გაყიდვა გაიმართება.
როგორც სააგენტო "ჯი-ეიჩ-ენთან" საუბრისას, "ბათუმის ტურისტული სააგენტოს" ხელმძღვანელის მოადგილემ, ეკა ჭანიშვილმა განაცხადა, გამოფენაზე წარმოდგენილი იქნება საკვები პროდუქტები, უალკოჰოლო და ალკოჰოლიანი სასმელები, მანქანა-დანადგარები, სასოფლო სამეურნეო ტექნიკა. დამთვალიერებელს საშუალება მიეცემა გაეცნოს უახლეს ტექნოლოგიებსა და ინოვაციებს სოფლის მეურნეობის დარგში. გამოფენაში მონაწილეობას მიიღებენ აგრო-სასურსათო სექტორში დასაქმებული, როგორც ადგილობრივი,ისე უცხოური კომპანიები.
"ის ფაქტი, რომ ბათუმი უკვე მეორეჯერ იქნა არჩეული აგრო-სასურსათო პროდუქციისა და ტექნოლოგიების საერთაშორისო გამოფენის მასპინძელ ქალაქად, მეტყველებს ამ ქალაქის დიდ პოტენციალზე თავისი არაჩვეულებრივი გეოგრაფიული მდებარეობით, ხელსაყრელი გარემოთი და უნიკალური პროდუქციით"- აღნიშნა ეკა ჭანიშვილმა.
აგრო-სასურსათო პროდუქციის და ტექნოლოგიების საერთაშორისო გამოფენა-გაყიდვა აჭარის სოფლის მეურნეობის სამინისტროს ინიციატივითა და , აჭარის ტურიზმისა დეპარტამენტისა და ბათუმის ტურისტული სააგენტოს ორგანიზებით ტარდება.