2011 წლის ოქტომბერში 2010 წლის ოქტომბერთან შედარებით ინფლაციის დონემ საქართველოში 2,3 პროცენტი შეადგინა. "საქსტატის" ინფორმაციით, 12-თვიან პერიოდში აღნიშნული მაჩვენებლის ფორმირებაში ძირითადი გავლენა იქონია ფასების ცვლილებამ შემდეგ ჯგუფებზე: სურსათი და უალკოჰოლო სასმელები: მოცემულ პერიოდში ფასები გაიზარდა 1,5 პროცენტით და ჯგუფის წვლილმა წლიური ინფლაციის საერთო მაჩვენებელში 0,7 პროცენტული პუნქტი შეადგინა.
სტატისტიკის ეროვნული სამსახურის ინფორმაციით, ფასების ზრდის მაღალი მაჩვენებლები დაფიქსირდა ხორცსა და ხორცის პროდუქტების ქვეჯგუფზე
(21,8 პროცენტი), შაქარსა და ტკბილეულობის ქვეჯგუფზე (10,0 პროცენტი), ზეთი და ცხიმის ქვეჯგუფზე (6,7 პროცენტი). ფასების შემცირება დაფიქსირდა ბოსტნეული, ბაღჩეული, კარტოფილი და სხვა ბოლქოვანებზე (18,9 პროცენტი), ხილისა და ყურძნის ქვეჯგუფზე (14,5 პროცენტი).
ტრანსპორტი: ფასები გაიზარდა 16,3 პროცენტით. შესაბამისად, ჯგუფის წვლილმა წლიური ინფლაციის საერთო მაჩვენებელში 1,6 პროცენტული პუნქტი შეადგინა. აღნიშნულ ჯგუფში ფასების მნიშვნელოვანი მატება დაფიქსირდა შემდეგ ქვეჯგუფებზე: სამოქალაქო საგზაო ტრანსპორტზე (24,3
პროცენტი) სატრანსპორტო მომსახურების ქვეჯგუფზე (23,9 პროცენტი) და საწვავ-საპოხი მასალების ქვეჯგუფზე (14,1 პროცენტი).
2011 წლის ოქტომბერში 2010 წლის ოქტომბერთან შედარებით ფასების 7,6 პროცენტიანი კლება დაფიქსირდა კავშირგაბმულობის ჯგუფზე, რომლის წვლილმაც ინფლაციის საერთო მაჩვენებელში -0,3 პროცენტული პუნქტი შეადგინა.