3-5 ნოემბერს საქართველოს ეროვნული საინვესტიციო სააგენტოს დელეგაცია, დირექტორის, ქეთი ბოჭორიშვილის ხელმძღვანელობით, დაესწრება ჰონგ-კონგის ღვინისა და სპირტიანი სასმელების საერთაშორისო კონკურსს.
2011 წლის კონკურსი პირველია ქართული სასმელების მწარმოებლებისთვის. სააგენტოს ექსპორტის ხელშეწყობის სამსახურის მიერ 37 ღვინის და სპირტიანი სასმელის სახეობაა წარდგენილი. ნიმუშების გაგზავნა ჰონგ-კონგის ერთ-ერთი ყველაზე გავლენიანი ღვინის საკონსულტაციო კომპანიის რჩევების საფუძველზე მოხდა, რაც უდავოდ წარმატების წინაპირობაა.
კონკურსის შედეგები საჯაროდ გამოცხადდება ჰონგ-კონგის საერთაშორისო ღვინისა და ალკოჰოლურის სასმელების გამოფენაზე, სადაც სააგენტოს წილობრივი დაფინანსებით შემდეგი შვიდი ქართული კომპანია იღებს მონაწილეობას: "ბაგრატიონი", "სარაჯიშვილი", "თბილღვინო", "შატო მუხრანი", "კახური ტრადიციული მეღვინეობა", "ხარება" და "კორპორაცია ქართული ღვინო". კონკურსის და გამოფენის საორგანიზაციო საკითხები ქართული ღვინის ასოციაციის მეშვეობით გადაწყდა.
ჰონგ-კონგის საერთაშორისო ღვინისა და სპირტიანი სასმელების კონკურსი წელიწადში 1500 განაცხადს იღებს. კონკურსი არის რეგიონში ყველაზე მნიშვნელოვანი მოვლენა ალკოჰოლური სასმელების წარმოსაჩენად. წარმატებული ბრენდები უფასო სარეკლამო კამპანიის გარდა სარგებლობენ დიდი მოთხოვნით ადგილობრივ ბაზარზე.
წინასაღონისძიებო პრესკონფერენციებზე უკვე გაჟღერდა ქართული ღვინის თემა. ჰონგ-კონგის ადგილობრივ მედიაში ქართული ღვინოები არა ზოგადად, არამედ უნიკალური ჯიშების კონტექსტშიც მოიხსენიება (საფერავი, ჩინური, მწვანე, ციცქა, ცოლიკოური, ქინძმარაული და ა.შ.). დიდი ინტერესი დაფიქსირდა საინვესტიციო სააგენტოს ეროვნულ სტენდთან დაკავშირებითაც, სადაც შვიდი ქართული კომპანია წარადგენს პროდუქციას. სააგენტოს პარტნიორი ჰონგკონგური მარკეტინგული კომპანიის მიერ უკვე მოხდა იმ ბიზნესმენების ინფორმირება, რომელთაც ინტერესი გამოხატეს ქართული პროდუქციის მიმართ, მაგრამ ვერ ახერხებენ 25 ნოემბერს თბილისში ჩამოსვლას.
