ამიერიდან, სურსათის მწარმოებელი საწარმოების შემოწმების უფლება, სურსათის ეროვნულ სააგენტოსთან ერთად, აკრედიტირებულ კერძო საინსპექციო ორგანოებსაც მიეცემათ. აღნიშნულ ინიციატივას კი "საქართველოს კოდექსი სურსათის/ცხოველის საკვების უვნებლობის ვეტერინარიისა და მცენარეთა დაცვის შესახებ" და "საქართველოს კოდექსი პროდუქტის უსაფრთხოებისა და თავისუფალი მიმოქცევის შესახებ" ითვალისწინებს.
ევრაზიის თანამშრომლობის ფონდის წარმომადგენლის ვახტანგ კობალაძის განმარტებით, ახალი საკანონმდებლო პაკეტით, კერძო საინსპექციო ორგანოების შექმნაა გათვალისწინებული, თუმცა მისი აზრით სათანადო კომპანიების შექმნა და კადრების მოძიება გაძნელდება.
"ანუ ინსპექტირება სურსათის ოპერატორებისა უნდა განხორციელდეს კერძო საინსპექციო ორგანოების მიერ, რომელიც ბუნებაში არ არსებობს.
კანონპროექტი ითვალისწინებს ასევე, ფასიან შემოწმებას, ანუ მეწარმემ ინსპექტირებისათვის თანხა უნდა გადაიხადოს, რაც პრობლემატური მომენტია და ბიზნესისთვის დამატებით ტვირთს შექმნის.
ინსპექტირებას განახორციელებს სურსათის ეროვნული სააგენტოც, თუმცა ძირითადი ტვირთი მაინც კერძო შემმოწმებლებზე გადავა, თუმცა სააგენტო ყოველთვის ამბობდა, რომ არ არის კადრი და ადამიანური რესურსი ინსპექტირებისათვის და ძნელი სათქმელია, სამომავლოდ თუ საიდან გაჩნდებიან ეს მაკონტროლებლები"- აღნიშნა ვახტანგ კობალაძემ.
ექსპერტი სურსათის უვნებლობის საკითხებში, წარსულში სურსათის უვნებლობის მრავალი საკანონმდებლო ინიციატივის ავტორი და ყოფილი დეპუტატი, ზურაბ ცქიტიშვილი საწარმოების კერძო მაკონტროლებლების მიერ შემოწმების ფაქტს დადებითად აფასებს.
"ამ ნორმას მივესალმები, თუმცა ჩემი კოლეგები არასამთავრობო ორგანიზაციიდან აღნიშნულ რეგულაციას ეწინააღმდეგებიან. ვფიქრობ, რომ გაცილებით ობიექტური და არაკორუფციული იქნება ასეთი ინსპექტირების განხორციელება"- განმარტა ზურაბ ცქიტიშვილმა.
ზურაბ ცქიტიშვილი განმარტავს, რომ ახალი საკანონმდებლო ინიციატივით, ბიზნესს წარმოებაში HACCP-ის დანერგვის აუცილებლობა აღარ აქვს.
"დღეისათვის არსებული კანონმდებლობით, მაღალი რისკის საწარმოებში უსაფრთხოების შიდა კონტროლის სისტემების დანერგვა ე.წ HACCP-ის სისტემა აუცილებელია, თუმცა წარმოდგენილი კანონპროექტით მისი დანერგვის აუცილებლობა დღისწესრიგიდან მოხნილია. თუმცა იქვე მითითებულია, რომ მიკვლევადობა აუცილებელია. აღსანიშნავია, რომ ეს ორი სისტემა ძირითადად ერთად მოქმედებს, იქ სადაც არის HACCP-ის სისტემა არის მიკვლევადობაც"- აღნიშნა ზურაბ ცქიტიშვილმა.
კანონპრექტის მიხედვით სურსათის ეროვნული სააგენტო უფლებას იტოვებს, რომ მოულოდნელი ინსპექტირება განახორციელოს.
"იარსებებს მოულოდნელი ინსპექტირებაც, რომელსაც სახელმწიფო განახორციელებს. ზიანის მიყენების შემთხვევაში კანონშივე გაიწერება თუ ვინ უნდა აანაზღაუროს ეს ზიანი. ხოლო რაც შეეხება სხვა ტიპის შემოწმებას, წინასწარ დგება გეგმიური შემომების ნუსხა, რომელიც რისკის შეფასებას ეფუძნება და სწორედ ამის საფუძველზე შედგენილი სიით მოხდება ინსპექტირება" აღნიშნა ცქიტიშვილმა.
თუმცა მაკონტრობელი ვალდებულია მინიმუმ ერთი თვის ადრე შეატყობინოს საწარმოს, რომ მისი შემოწმება უნდა განხორციელდეს, რაც ცხადია ბიზნესს გარკვეული თანხა დაუჯდება.
ექსპერტი ზურაბ ცქიტიშვილის ამბობს, რომ აღნიშნული კანონპროექტის მიზანია, რომ საქართველოს კანონმდებლობა ევროპულ კანონმდებლობას დაუახლოვდეს. "კანონპროექტთან დაკავშირებით გარკვეული შენიშვნები მაქვს. კანონპროექტის ძირითადი მიზანია რისკის ანალიზის პროცედურა და მასში შემავალი რისკის შეფასების პროცესი. რისკის შეფასების პროცესთან დაკავშირებით ჩვენი დამოკიდებულებაა, რომ ის უნდა განხორციელდეს, გამჭვირვალედ და ობიექტურად. ეს არ უნდა იყოს მოთავსებული მაკონტროლებლის ადმინისტრირების ქვეშ"- განაცხადა ექსპერტმა.
