შეხვედრაზე, რომლის მთავარი მოდერატორიც სავაჭრო-სამრეწველო პალატის პრეზიდენტი კახა ბაინდურაშვილი იყო, პრემიერ-მინისტრმა ნიკოლოზ გილაურმა 2011-2015 წლებში საქართველოს ეკონომიკის ძირითადი მიმართულებებისა და დასაქმების პრობლემის დაძლევის ერთიანი სტრატეგიის შესახებ ისაუბრა. პრეზენტაციის ფარგლებში სიტყვით გამოვიდა ფინანსთა მინისტრი დიმიტრი გვინდაძე. პრემიერ-მინისტრმა და ფინანსთა მინისტრმა ბიზნესსაზოგადოებას დეტალურად გააცნეს უახლოესი წლების ქვეყნის სოციალურ-ეკონომიკურ პოლიტიკა, რომელშიც დეტალურადაა გაწერილი ყველა ის ამოცანა/პროექტი, რომელზედაც სამინისტროები, მათ შორის, ფინანსთა სამინისტრო იმუშავებს მომდევნო 5 წლის განმავლობაში მთავარი მიზნის მისაღწევად - უმუშევრობის შესამცირებლად და ქვეყანაში ახალი სამუშაო ადგილების შესაქმნელად, რაც სახელმწიფოსა და კერძო სექტორის თანამშრომლობას ითვალისწინებს.

მთავრობა გეგმავს ახალი სამუშო ადგილებისთვის ქვეყანაში შეინარჩუნოს და გააუმჯობესოს ჯანსაღი, სტაბილური მაკროეკონომიკური გარემო (უზრუნველყოს ეკონომიკის ზრდა, მცირე და კონტროლირებადი საბიუჯეტო დეფიციტი, ერთნიშნა ინფლაცია, საგარეო ვალის კონსერვატიული და პრაგმატული მართვა, ფისკალური მდგრადობისათვის მნიშვნელოვანი სხვა პარამეტრები) კორუფციის დაბალი დონე, უკეთესი მომსახურება, უზრუნველყოს საქართველოს ჩამოყალიბება რეგიონის, ტურისტულ, სავაჭრო და ლოჯისტიკური ცენტრად, ასევე ახალი ინფრასტრუქტურული და ენერგეტიკული პროექტების დაწყება(რისთვისაც ყოველ წელს საგზაო პროექტებზე დასაქმდება - 30 000 ადამიანი; რკინიგზაზე - 8 000-დან 10 000-მდე, წყლის პროექტებზე - 20 000 ათასი, ენერგეტიკულ პროექტებზე - 13 000-დან - 15 000-მდე) განავითაროს სოფლის მეურნეობა, (მთავარი მიზანი შესანახი მეურნეობების განვითარების გზით ექსპორტის ხელშეწყობა)განათლების სისტემა, განახორციელოს ეფექტური სოციალური პოლიტიკა, უზრუნველყოს ხელმისაწვდომი და ხარისხიანი ჯანდაცვა(150-მდე განახლებული სამედიცინო ცენტრის გახსნა ახალი, მაღალკვალიფიციური პერსონალის დასაქმებით) ურბანული და რეგიონული განვითარება.

როგორც პრეზენტაციაზე აღინიშნა, საქართველოს მთავრობა ელის საქმიან წინადადებებსა და შენიშვნებს ბიზნესის მხრიდან, რომელთა გათვალისწინება მნიშვნელოვანი იქნება სტრატეგიის საბოლოო სახით ჩამოყალიბებისთვის. აღნიშნული გეგმა მსოფლიო ეკონომიკაში მიმდინარე პროცესების გათვალისწინებით, ყოველ 6 თვეში განახლდება და ბიზნესსექტორს შეეძლება აქტიური მონაწილეობა მიიღოს ახალი ინიციატივებისა და პროექტების წარდგენის მიმართულებით. მთავრობის 10-პუნქტიანი გეგმის აღნიშნულ ფორმატში განხილვა მნიშვნელოვანია იმ კუთხითაც, რომ ბიზნესს წინასწარ ეცოდინება მთავრობის პრიორიტეტების შესახებ, რაც მათ ბიზნესის სწორად დაგეგმვის საშუალებას მისცემს.