2 ნოემბერს, 14:00 საათზე, სასტუმრო "ამბასადორში~ გაიმართება კონფერენცია, სადაც ოფიციალურად გაიხსნება ევროკავშირის პროექტი, სახელწოდებით "მეტროლოგიისა და სტანდარტიზაციის გაძლიერება ევროკავშირის საუკეთესო პრაქტიკის შესაბამისად". ღონისძიებას გახსნიან საქართველოს ეკონომიკისა და მდგრადი განვითარების მინისტრის მოადგილე ირაკლი მატკავა და ევროკავშირის დელეგაციის ხელმძღვანელის მოადგილე ბორის იაროჩევიჩი.
პროექტის ძირითადი მიზანია ვაჭრობაში ტექნიკური ბარიერების აღმოფხვრისა და საქართველოს საერთაშორისო ვაჭრობაში ინტეგრირების ხელშეწყობა, ასევე საქართველოში წარმოებული პროდუქციის ხარისხის გაუმჯობესების გზით მისი საექსპორტო შესაძლებლობების გაზრდა. პროექტი წარმოადგენს საქართველოსა და ევროკავშირს შორის ყოვლისმომცვლელი თავისუფალი ვაჭრობის შეთანხმებისთვის ხელსაყრელი პირობების შექმნის ერთ-ერთ ინსტრუმენტს.
უცხოურ ბაზრებზე შეღწევისთვის, პროდუქტი უნდა შეესაბამებოდეს სპეციფიკურ სტანდარტებს. ეს სტანდარტები კი მუშავდება და იზომება პროცესებისა და მოწყობილობების საშუალებით. მეტროლოგია ის მეცნიერებაა, რომელიც განსაზღვრავს სპეციფიური გაზომვების სიზუსტეს, რაც უზრუნველყოფს ვაჭრობისთვის აუცილებელ საიმედო და ზუსტ გაზომვებს.
პროექტი დაფინანსებულია ევროკავშირის მიერ (1,4 მლნ. ევრო). მისი მიზანია, დაეხმაროს საქართველოს ეკონომიკისა და მდგრადი განვითარების სამინისტროს სტანდარტების, ტექნიკური რეგლამენტების და მეტროლოგიის ეროვნულ სააგენტოს. პროექტის განხორციელება ხელს შეუწყობს სააგენტოს მომავალ განვითარებას და მეტროლოგიის და სტანდარტიზაციის მიმართულებების გაძლიერებას. მეტროლოგიის საკითხში პროექტის მთავარი მიზანია დაკალიბრების და გაზომვის შესაძლებლობების საერთაშორისო აღიარების უზრუნველყოფა, ხოლო სტანდარტიზაციის ნაწილში მთავარ მიზანს მსოფლიო სავაჭრო ორგანიზაციის მიერ დადგენილ სტანდარტებთან და პროცედურებთან შესაბამისობა წარმოადგენს.
პროექტში მონაწილეობენ ევროკავშირის ექსპერტები გერმანული ფიზიკა-ტექნიკური უწყებიდან, ნივთიერებათა კვლევის და გამოცდის ინსტიტუტიდან, ლიტვის სტანდარტების ორგანოდან და სხვა შესაბამისი უწყებებიდან.
