დღეს ბათუმში საქართველოს სოფლის მეურნეობის მინისტრი ზაზა გოროზია ციტრუსის 2011 წლის სეზონისთვის მზადებასთან დაკავშირებით, მოსახლეობას, მეციტრუსეებს, ციტრუსის ექსპორტიორი და გადამზიდავი კომპანიების წარმომადგენლებს შეხვდა.
გოროზიამ და აჭარის სოფლის მეურნეობის მინისტრმა ბიზნესმენებთან და მეციტრუსეებთან შეხვედრაზე, ციტრუსის სეზონის ორგანიზებულად ჩატარების საკითხები განიხილეს, რათა მოსავლის დროული დაბინავება, ციტრუსის სწრაფი, ორგანიზებული გადაზიდვა და ეფექტური ექსპორტი განხორციელდეს.
წელს აჭარაში ციტრუსის გაორმაგებულ მოსავალს ელოდებიან. როგორც გოროზიამ განაცხადა, ძალიან მნიშვნელოვანია მოსავლის ექსპორტზე გატანა. გასაღების მთავარი ბაზრებია უკრაინა და ბელორუსი. ამჟამად, ქართული ციტრუსი ექსპორტზე 10 ქვეყანაში გადის. წინასწარი მონიტორინგის შედეგად, ციტრუსის მოსავალი 85 000 ტონას აღემატება, აქედან 65 ათასი ტონა საექსპორტო პროდუქცია იქნება.
