ბათუმში, ხიმშიაშვილის ქუჩაზე ელიტური საცხოვრებელი კომპლექსის "ბინა ბათუმის ბულვარში" მშენებლობა 3-ცვლიან რეჟიმში გადადის. კომპლექსში, რომელშიც ბინები უკვე ეკუთვნით "აგვისტოს 5 დღის" რეჟისორს რენი ჰარლენს, მსოფლიოში ცნობილ ბარიტონ ლადო ათანელსა და მომღერალ ნიაზ დიასამიძეს, სამუშაოები 15 თვეში დასრულდება. აჭარის მთავრობის თავმჯდომარემ, ლევან ვარშალომიძემ მშენებლობა გვიან ღამით დაათვალიერა:
„ბათუმი ვითარდება და ჩვენი ამოცანაა, რომ იგი იყოს უფრო ლამაზი და მიმზიდველი არა მარტო ბათუმელებისთვის, არამედ ტურისტებისა და ინვესტორებისთვის. მისასალმებელია, რომ კომპანია "ორბი ჯგუფი" მშენებლობის დასავლურ ტემპებზე გადადის. მეორეს მხრივ, ღამით მიმდინარე სამუშაოებით შექმნილი უხერხულობის გამო მეზობელ სახლებში მცხოვრებთ ბოდიშს ვუხდით"- განაცხადა ვარშალომიძემ.
როგორც ცნობილია, კომპლექსი 3 სახლისგან შედგება, რომელთაგან ორი 25-25-სართულიანია, ხოლო მესამე - 34-იანი. მშენებელი "ორბი ჯგუფი" სამუშაოები ქალაქში ამჟამად 6 პროექტს ახორციელებს 300 ათას კვ.მ ფართობზე. კომპანია უახლოეს დღეებში მე-7 მშენებლობას იწყებს. ლევან ვარშალომიძის განცხადებით, განსაკუთრებით მნიშვნელოვანია, რომ კომპანიას დასაქმებული ჰყავს 350 ადამიანი და ეს რიცხვი უახლოეს დღეებში 550-მდე გაიზრდება.
