სამშენებლო პროდუქციის საერთაშორისო გამოფენა აჭარის მთავრობის თავჯდომარემ გახსნა. ლევან ვარშალომიძე მთავრობის წევრებთან ერთად ყინულის სასახლეში სხვადასხვა კომპანიის კუთხეებს ეწვია და მათ მიერ წარმოდგენილ რესურსს გაეცნო.
"სამშენებლო და დიზაინის საერთაშორისო გამოფენა - 2011" აჭარაში პირველად იმართება. გამოფენაზე სამშენებლო მასალა, დანადგარები, აღჭურვილობა, არქიტექტურული ტექნოლოგიები, ინტერიერისა და ექსტერიერის დიზაინის ნიმუშები არის წარმოდგენილი. მასში 70-მდე ქართული და უცხოური კომპანია მონაწილეობს.
"ჩვენი ქალაქი დღითიდღე ვითარდება და შენდება. ეს გამოფენა კი ხელს შეუწყობს ქართულ ბაზარზე უფრო მეტი უცხოური კომპანიის შემოსვლას, რაც მშენებლობების რაოდენობასა და ხარისხს კიდევ უფრო გაზრდის", - განაცხადა ლევან ვარშალომიძემ.
"სამშენებლო და დიზაინის საერთაშორისო გამოფენა 2011" სამ დღეს გაგრძელდება. იგი აჭარის ფინანსთა და ეკონომიკის სამინისტროს ორგანიზებით ტარდება.