საქართველოსა და უკრაინის მთავრობები ორ ქვეყანას შორის ტვირთბრუნვისა და ინვესტიციების მოცულობის ზრდას მოელიან. როგორც სასტუმრო "ჰოლიდეი ინში" გამართულ საქართველო-უკრაინის ბიზნესფორუმზე ითქვა, უკრაინული ბიზნესი საქართველოს საინვესტიციო გარემოს შესწავლითა და შემდგომ ათვისებით დაინტერესებულია.
"უკრაინის ვიცე-პრემიერმა საქართველოში 100-ზე მეტი ბიზნესმენი ჩამოიყვანა. საქართველოს მიმართ ასეთი დიდი ინტერესი თუ იქნებოდა, ნამდვილად არ ველოდით. თუმცა როგორც თავად ამბობენ, ინტერესი კიდევ უფრო მეტია და გაცილებით მეტს სურს საქართველოში ჩამოსვლა. რაც საქართველო-უკრაინის ეკონომიკური ურთიერთობების გაღრმავების საწინდარია. მნიშვნელოვანია, რომ უკრაინული დელეგაციის საქართველოში ჩამოსვლის მიზეზი ქართული რეფორმების გაზიარება და ამ რეფორმების ექსპორტია საქართველოდან უკრაინაში", - განაცხადა საქართველოს პრემიერ-მინისტრმა ნიკოლოზ გილაურმა ბიზნესფორუმის დასრულების შემდენ.
უკრაინის ვიცე-პრემიერი სერგეი ტიგიპკო განმარტავს, რომ ქვეყნის ეკონომიკური ურთიერთობა დინამიკურად ვითარდება და ამ ორი ქვეყნის ურთიერთობაში პოლიტიკური დაძაბულობა არ არსებობს.
"მოხარული ვარ, რომ საქართველოში კიდევ ერთხელ ჩამოვედ. აქ ვიმყოფები სამთავრობო და კერძო სექტორის წარმომადგენლებთან ერთად. 2010 წელს უკრაინა-საქართველოს შორის სავაჭრო ბრუნვა 32 %-ით გაიზარდა და წელს ზრდის ტემპი კიდევ უფრო მაღალია. ვიმედოვნებ, რომ დღევანდელი ბიზნესფორუმი ინვესტიციების მოცულობას, კიდევ უფრო გაზრდის. ჩვენს შორის პოლიტიკური პრობლემები არ არსებობს", - განაცხადა უკრაინის ვიცე-პრემიერმა.
საქართველოს ეკონომიკისა და მდგრადი განვითარების მინისტრის პირველი მოადგილე, ქვეყანაში უკრაინული ინვესტიციების მოცულობით კმაყოფილი არ არის, თუმცა განმარტავს, რომ სახელმწიფოს მხრიდან ხელშეწყობის შემდეგ ინვესტიციების მოცულობა აუცილებლად გაიზრდება.
"უკრაინასა და საქართველოს შორის ბოლო პერიოდში ვაჭრობა გაიზარდა, საქართველოდან ექსპორტი 38 %-ითაა გაზრდილი, ხოლო იმპორტი დაახლოებით იმავე მოცულობით გაიზარდა. თუ კი სახელმწიფოები დავსახავთ მიზნებს და სამთავრობათაშორის კომისიის სხდომას გავმართავთ ყოველწლიურად, შევქმნით საფუძველს, რომ ბიზნესმა კიდევ უფრო კარგად იგრძნოს თავი. კარგია, რომ საქართველოში 100-ზე მეტი უკრაინელი ბიზნესმენი ჩამოვიდა, რადგანაც ბიზნესები უნდა დაახლოვდნენ და საქმე უნდა აკეთონ. ჩვენ მათ ამისათვის მხოლოდ ხელი უნდა შევიწყოთ.
ინვესტიციები უცნაურად მცირეა, შარშან საქართველოში უკრაინიდან 3 მლნ დოლარის ინვესტიცია განხორციელდა და ვვარაუდობთ, რომ წელს აღნიშნული მოცულობა კიდევ უფრო გაიზრდება", - განაცხადა ეკონომიკისა და მდგრადი განვითარების მინისტრის პირველმა მოადგილემ არჩილ კეკელიამ.
"უკრაინიდან საკმაოდ წარმომადგენლობითი დელეგაცია ჩამოვიდა. აღსანიშნავია, რომ ბიზნესფორუმი სამთვრობათაშორისი კომისიის სხდომას დაემთხვა, რომელიც დღეს, დღის პირველ ნახევარში გაიმართა. უკრაინელი ბიზნესმენების მხრიდან საკმაოდ დიდი დაინტერესებაა და საქართველოში ჩამოსულია 100-მდე ბიზნესმენი, რომლებიც საკმაოდ ბევრ სფეროებს მოიცავენ. ვფიქრობთ, რომ ბიზნესფორუმი ხელს შეუწყობს შემდგომი ურთიერთობების გაღრმავებას", - განაცხადა სავაჭრო-სამრეწველო პალატის პრეზიდენტმა კახა ბაინდურაშვილმა.
ბიზნესფორუმის ფარგლებში გარკვეული დრო ორმხრივ შეხვედრებს დაეთმო, სადაც ქართულ კომპანიებს შესაძლებლობა ჰქონდათ, მოლაპარაკებები გაემართათ პოტენციურ ბიზნესპარტნიორებთან, შესაბამისი სექტორების მიხედვით.
უკრაინის დელეგაციაში შემავალი ბიზნესმენები წარმოადგენდნენ კომპანიებს სოფლის მეურნეობის, საფინანსო, ტელეკომუნიკაციის და ტურიზმის სფეროებიდან. მათი მიზანია საქართველოში ბიზნესპარტნიორების მოძიება და საქმიანი ურთიერთანამშრომლობის დაგეგმვა.
ეროვნული საინვესტიციო სააგენტოს ინფორმაციით, აღსანიშნავია, რომ უკრაინა მეტად აქტიურად ინტერესდება საქართველოს მთავრობის მიერ განხორციელებული მყისიერი რეფორმებით, რაც გამოიხატება წელს უკრაინული დელეგაციების ხშირი ვიზიტებით ჩვენს ქვეყანაში და ასევე მრავალი სატელევიზიო სიუჟეტებით, რომლებსაც წამყვანი უკრაინული ტელეარხები უძღვნიან საქართველოს წინსვლას, როგორც ბიზნესის ისე პოლიტიკური კუთხით. 2011 წლის დასაწყისიდან უკრაინიდან საქართველოს 4 დელეგაცია ესტუმრა, ამასთანავე ინდივიდუალური ვიზიტები განახორციელეს პოტენციურმა ინვესტორებმა.
