ქრისტიან-დემოკრატიული მოძრაობის ლიდერი გიორგი თარგამაძე ეროვნულ ბანკს ისეთი მექანიზმის მოფიქრებისკენ მოუწოდებს, რომელიც საქართველოს საბანკო სექტორში სოფლის მეურნეობის დაკრედიტებას ადვილად ხელმისაწვდომს გახდის.
გიორგი თარგამაძის განცხადებით, 2010 წლის განმავლობაში კომერციული ბანკების მიერ გაცემული კრედიტების მხოლოდ 2,5% მოდიოდა სოფლის მეურნეობის დაკრედიტებაზე, რაც არ არის გასაკვირი, რადგან ბანკები მოგებაზე ორიენტირებული სუბიექტები არიან და მაღალი მოგება სჭირდებათ.
დღეს პარლამენტის სხდომაზე გამოსვლისას თარგამაძემ განაცხადა, რომ რაც არ უნდა ნოტაციები უკითხონ ბანკებს, შედეგს არ მოიტანს და თუ ასე გაგრძელდა, მალე სოფელში ადამიანი აღარ დარჩება, რომელთაც ბანკებიდან კრედიტი დასჭირდებათ.
"გთავაზობთ, ეროვნულმა ბანკმა იფიქროს ისეთ მექანიზმზე, რომელიც საქართველოს საბანკო სექტორში სოფლის მეურნეობის დაკრედიტებას ადვილად ხელმისაწვდომს და ინტენსიურს გახდის. ჩვენ გთავაზობთ გაითვალისწინოთ ისრაელის, აშშ-ს და რამდენიმე წამყვანი სახელმწიფოს გამოცდილება და ქვეყანაში დაარსდეს სახელმწიფო კომერციული ბანკი სოფლის მეურნეობის პროექტების დასაფინანსებლად", - განაცხადა გიორგი თარგამაძემ.
