ქსელური გადაწყვეტების მიმწოდებელი კომპანია „გრინნეტი" კომუნიკაციების დარგში მსოფლიოში ლიდერი კომპანია „ცისკოს" ოქროს პარტნიორი გახდა. როგორც სააგენტო "ჯი-ეიჩ-ენთან" საუბრისას, „გრინნეტის" სისტემების არქიტექტორი ნიკოლოზ დავითაშვილი აცხადებს, ამ აღიარების შემდეგ კომპანიის გაყიდვები ერთ წელიწადში 300-400 %-ით გაიზრდება. დავითაშვილის განმარტებით, კომპანიას შესაძლებლობა ეძლევა ასევე ახალი ბაზრები აითვისოს და საკუთარი მომსახურება ცენტრალური აზიისა და აღმოსავლეთ ევროპის ქვეყნებს შესთავაზოს.
კომპანიის მენეჯმენტი ამბობს, რომ „გრინნეტი" ერთადერთი ქართული კომპანია, რომელსაც საინფორმაციო ტექნოლოგიებისა და კომუნიკაციების დარგში მსოფლიოში ლიდერი კომპანია „ცისკოს" ოქროს პარტნიორის სტატუსი მიენიჭა.„გირნნეტის" წარმატება მნიშვნელოვანი მოვლენაა, არა მარტო საქართველოსთვის, არამედ მთელი რეგიონისთვის, რადგან ის ლიდერი კომპანიაა სამხრეთ კავკასიის რეგიონსა და აღმოსავლეთ ევროპაში. საქართველო რეგიონში ლიდერია სისტემური ინტეგრაციისა და ქსელური გადაწყვეტების მიწოდების დარგში და „გრინნეტი" ერთადერთი კომპანიაა რეგიონში, რომელიც „ცისკოს" ოქროს პარტნიორის სტატუსს ფლობს.
ოქროს პარტნიორის სტატუსი იმ კომპანიებს ენიჭებათ, რომლებიც „ცისკოს" სერვისებისა და შეთავაზებების ინტეგრირებას პარტნიორული პროგრამის შესაბამისად ახორციელებენ. ამასთანავე ზრუნავენ საკუთარი გუნდის პროფესიული კვალიფიკაციის ამაღლებასა და მომხმარებელთათვის კომფორტული მომსახურების შექმნაზე.
„გრინნეტი" მსოფლიოში წამყვანი ტექნოლოგიური კომპანიების პარტნიორია. „ცისკოს" ოქროს პარტნიორის სტატუსი კი საშუალებას მოგვცემს, რომ მომხმარებელს გაცილებით მაღალი ხარისხის მომსახურება შევთავაზოთ, _ ამბობს კომპანიის სისტემების არქიტექტორი ნიკოლოზ დავითაშვილი.
„საქართველო რეგონში ლიდერი ქვეყანაა, სადაც IT ტექნოლოგიები მაღალ დონეზეა განვითარებული. „გრინნეტი" ერთადერთი კომპანიაა აღმოსავლეთ ევროპასა და ცენტრალური აზიის ქვეყნებში, რომელიც „ცისკოს" ოქროს პარტნიორის სტატუსს ფლობს. ის ლიდერია კომპანიაა სისტემური ინტეგრაციისა და ქსელური გადაწყვეტების მიწოდების დარგში. სწორედ კომპანიის მიერ მიღებული კარგი რეზულტატი გახდა იმის გარანტი, რომ ჩვენ ჩაგვედო ინვესტიცია ამ კომპანიაში და ჩვენი ოქროს პარტნიორები გამხდარიყვნენ," - განაცხადა „ცისკოს" გენერალურმა მენეჯერმა აღმოსავლეთ ევროპისა და შუა აზიის ქვეყნებში პაველ ბურბამ.
კომპანია „ცისკოს" მოთხოვნების შესაბამისად 24 საათიან მომსახურებას შესთავაზებს მომხმარებელს, შესაბამსიად, მათი ინჟინრები არსებული პრობლემების დასარეგულირებლად უწყვეტ რეჟიმში იმუშავებენ.
„ცისკომ"„გრინნეტი" საქართველოს სისტემების წამყვან ინტეგრატორად და ქსელური გადაწყვეტების მიმწოდებლად გამოაცხადა. თავის მხრივ, ქართულ კომპანიას „ცისკოს" ოქროს პარტნიორის სტატუსი შესაძლებლობას მისცემს კიდევ უფრო მაღალი ხარისხის მომსახურება და დივერსიფიცირებული გადაწყვეტილებები შესთავაზოს მომხმარებელს.
აღსანიშნავია, რომ ოქროს სერტიფიცირებული პარტნიორის სტატუსი იმ კომპანიას ენიჭება, რომელიც „ცისკოს" სერვისებისა და შეთავაზებების ინტეგრირებას პარტნიორული პროგრამის შესაბამისად ახორციელებს, მუდმივად ზრუნავს როგორც საკუთარი გუნდის პროფესიული კვალიფიკაციის ამაღლებაზე, ისე მომხმარებელთა კმაყოფილების მაღალი დონის შენარჩუნებაზე და ეხმარება მათ სტრატეგიული გეგმების განხორციელებაში.
შეგახსენებთ, რომ „გრინნეტი" დაარსდა 1998 წელს. მოკლე დროში კომპანია საქართველოს მასშტაბით წამყვან სისტემურ ინტეგრატორად და ქსელური გადაწყვეტილებების მიმწოდებლად იქცა. „გრინნეტი" მსოფლიოში წამყვანი კომპანიების პარტნიორია, რომელთა დახმარებით ქართული კომპანიებისთვის მისაწვდომი ხდება უახლესი ტექნოლოგიური გადაწყვეტილებები. მცირე და საშუალო საწარმოები, მსხვილი კორპორაციები, ფინანსური და სატელეკომუნიკაციო კომპანიები ენდობიან კომპანიის მიერ შემუშავებულ და სპეციალურად მათ ამოცანებზე მორგებულ სისტემებს, რომლებიც უზრუნველყოფს არსებულ ინფრასტრუქტურასთან სრულ თავსებადობას და წარმადობის ამაღლებას.
