ხვალ, 28 ოქტომბერს, "ჰოლიდეი ინში" ქართულ-უკრაინული ბიზნესფორუმი გაიმართება. მასში მონაწილეობას უკრაინული კომპანიების წარმომადგენლები მიიღებენ, რომლებიც საქართველოში უკრაინის ვიცე-პრემიერ მინისტრის სერგეი ტიგიპკოს და უკრაინის მთავრობის წევრების ოფიციალური ვიზიტის ფარგლებში, ჩამოდიან.
ბიზნესფორუმზე უკრაინული მხრიდან წარმოადგენილი იქნება შემდეგი სექტორები: სოფლის მეურნეობა, საფინანსო, ტელეკომუნიკაცია და ტურიზმი. მათი მიზანია საქართველოში ბიზნეს პარტნიორების მოძიება და საქმიანი ურთიერთობების დამყარება. გაიმართება ორმხრივი შეხვედრები, სადაც ქართულ კომპანიებს საშუალება ექნებათ შეხვდნენ და მოლაპარაკებები გამართონ პოტენციურ ბიზნეს პარტნიორებთან შესაბამისი სექტორების მიხედვით.
ფორუმს გახსნიან საქართველოს პრემიერ-მინისტრი ნიკოლოზ გილაური და საქართველოს სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში გიორგი ბარამიძე.
იმავდროულად, 28 ოქტომბერს შედგება ქართულ-უკრაინული საქმიანი კლუბის შეხვედრა უკრაინელ მეწარმეთა დელეგაციასთან, რომლებიც ესტუმრებიან თბილისს ქართულ-უკრაინული საქმიანი ფორუმის ფარგლებში. დელეგაციის ვიზიტის მიზანია შემდგომი თანამშრომლობისათვის საქართველოში პარტნიორების მოძიება.
ქართულ-უკრაინული საქმიანი კლუბი უმასპინძლებს სხვადასხვა დარგის (სოფლის მეურნეობა, კვების მრეწველობა, მანქანათმშენებლობა, მედიცინა, მომსახურება და სხვა) 30-ზე მეტ უკრაინელ მეწარმეს. მათთვის წარმოდგენილი იქნება პრეზენტაციები საქართველოში ბიზნეს საქმიანობის წარმართვის პირობებისა და უპირატესობების შესახებ, ასევე მოეწყობა ქართველ ბიზნესმენებთან ორმხრივი შეხვედრები.
ქართულ-უკრაინული საქმიანი კლუბის უკრაინელ მეწარმეებთან შეხვედრას დაესწრება საქართველოში უკრაინის საელჩოს და საქართველოს სავაჭრო-სამრეწველო პალატის წარმომადგენლები.