პოლონეთი საქართველოს საზღვაო ტრანსპორტის რეფორმირებაში დახმარებას გაუწევს, შავი ზღვის რეგიონის ქვეყნებთან, მათ შორის, ბულგარეთსა და რუმინეთთან კი საბორნე მიმოსვლა გააქტიურდება - ეს არის მცირე ჩამონათვალი იმ პროექტებისა, რომელთა თაობაზედაც საქართველოს დელეგაციამ პოლონეთში გამართულ მინისტრიალზე შეთანხმებებს მიაღწია.
წარმომადგენლობითი ფორუმი აღმოსავლეთის პარტნიორობის ფარგლებში 25 ოქტომბერს ჩატარდა მას პოლონეთის ქალაქმა კრაკოვმა უმასპინძლა. პოლონეთი ამჟამად ევროკავშირის თავმჯდომარე ქვეყანაა და განსაკუთრებულ ყურადღებას აქცევს ევროკავშირის ინტეგრაციის პროექტებს მეზობელ სახელმწოფოებთან, მათ შორის, საქართველოსთან. სატრანსპორტო და ინფრასტრუქტურული მიმართულება ერთ-ერთი პრიორიტეტულია.
საქართველოს დელეგაციას ხელმძღვანელობდა ეკონომიკისა და მდგრადი განვითარების მინისტრი ვერა ქობალია. ფორუმზე სიტყვით გამოსვლისას, მინისტრმა ისაუბრა რეფორმებზე ტრანსპორტის სფეროში, რომელიც ითვალისწინებს ჰარმონიაზაციას როგორც საკანონმდებლო სფეროში, ისე ტრანსპორტის სექტორში პროფესიული სტანდარტების ამაღლებას.
საქართველომ მიაღწია პროგრესს სამოქალაქო ავიაციის სფეროში, დასასრულს უახლოვდება შიდასახელმწიფოებრივი პროცედურები ევროკავშირის ქვეყნებს შორის საქართველოსთან ღია ცის შეთანხმების ამოქმედებასთან დაკავშირებით, თუმცა რეფორმები გრძელდება როგორც საზღვაო, ისე სახმელეთო ტრანსპორტის მიმართულებით. ერთ-ერთი ამოსავალი კი ამ კუთხით უსაფრთხოების ამაღლება უნდა გახდეს.
საქართველოს სატრანსპორტო რეგულაციის ევროსტანდარტებთან ჰარმონიზაცია იყო ვერა ქობალიას შეხვედრის მთავარი საკითხი ევროკომისიის ვიცე-პრეზიდენტთან, ევროკომისართან ტრანსპორტის სფეროში სიიმ კალასთან, რომელიც წლების განმავლობაში ესტონეთის პრემიერ-მინისტრი იყო და უშუალოდ ხელმძღვანელობდა მისი ქვეყნის სატრანსპორტო ინფრასტრუქტურის რეფორმირებას. სიიმ კალასი ნოემბერში თბილისს ეწვევა და ადგილზე შეაფასებს საქართველოში მიმდინარე რეფორმებს ტრანსპორტის სფეროში. ევროკომისარის შეფასებით, აღმოსავლეთ პარტნიორობის ინიციატივის ქვეყნებიდან, საქართველო ყველაზე სწრაფად ახორციელებს სატრანსპორტო სექტორის რეფორმირებას.
საზღვაო ტრანსპორტი ერთ-ერთი ცენტრალური მიმართულებაა, რომელიც გადაუდებელ რეფორმირებას საჭიროებს. ამ მხრივ, საქართველოს დახმარებას პოლონეთი გაუწევს. თანამშრომლობის მემორანდუმს მინისტერიალის ფარგლებში მოეწერა ხელი. დოკუმენტის თანახმად, უახლოეს პერიოდში საქართველოს პოლონელ ექსპერტთან ჯგუფი ეწვევა ვითარების ადგილზე შესასწავლად.
შავი ზღვის ქვეყნებთან, განსაკუთრებით კი ბულგარეთთან და რუმინეთთან, საბორნე მიმოსვლის გააქტიურება იყო კიდევ ერთი საკითხი, რომელზედაც საქართველოს დელეგაციამ წინასაწარ შეთანხმებას მიაღწია. ამ საკითხზე მოლაპარაკება გაგრძელდება ტრასეკას მომდევნო სამიტზე, რომელიც ნოემბერში, რუმინეთში გაიმართება. აღნიშნული საკითხის პოზიტიურად გადაწყვეტა არა მხოლოდ გაზრდის ტვირთბრუნვას შავი ზღვის პორტებს შორის, არამედ აამაღლებს საქართველოს, როგორც სატრანზიტო ქვეყნის, კონკურენტუნარიანობას რეგიონის სხვა სახელმწიფოებთან მიმართებაში. სამთავრობოთაშორისი შეთანხმების ამოქმედება ასევე გაზრდის თანამშრომლობის ხარისხს რეგიონის ქვეყნების კომპანიებთან.
