2012 წლის აპრილიდან "იორდანიის სამეფო ავიახაზები" საქართველოს მიმართულებით რეგულარული ავიარეისების შესრულებას გეგმავს. ეს საკითხი იყო ერთ-ერთი ცენტრალური თემა საქართველოს ეკონომიკისა და მდგრადი განვითარების მინისტრის მოადგილის, გიორგი კარბელაშვილის შეხვედრაზე იორდანიის ჰაშემიტური სამეფოს ტრანსპორტის მინისტრ მოჰამად ქუდასთან.
შეხვედრაზე მხარეებმა დადებითად შეაფასეს ორ ქვეყანას შორის რეგულარული საჰაერო მიმოსვლის დაწყების მნიშვნელობა, რომელიც ხელს შეუწყობს ორმხრივი ეკონომიკური და საქმიანი კონტაქტების გააქტიურებას.
ვიზიტის ფარგლებში გაფორმდა შეთანხმება იორდანიასთან ტურიზმის სფეროში თანამშრომლობის შესახებ, რომელსაც ხელი მოაწერა ტურიზმის ეროვნული სააგენტოს თავმჯდომარემ, მაია სიდამონიძემ. გარდა ამისა, გაიმართა შეხვედრები ტურიზმის ინდუსტრიის წამყვანი კომპანიების წარმომადგენლებთან, რომლის დროსაც გადაწყდა საქართველოში იორდანიული ტუროპერატორების ჩამოსვლა ადგილობრივი ბაზრის გაცნობისა და საქმიანი ურთიერთობების დამყარების მიმართულებით.
საქართველოს დელეგაცია იორდანიაში ასევე გამართავს შეხვედრებს ამ ქვეყნის მრეწველობისა და ვაჭრობის სამინისტროსა და მსხვილი გადამზიდავი კომპანიების პასუხისმგებელ პირებთან. დელეგაციის ვიზიტი, რომელსაც ხელმძღვანელობს ეკონომიკისა და მდგრადი განვითარების მინისტრის მოადგილე გიორგი კარბელაშვილი, გაგრძელდება კატარში, ბაჰრეინსა და კუვეიტში.
