ათ პუნქტიანი სამოქმედო გეგმის მნიშვნელოვანი ნაწილია ასევე სოფლის მეურნეობა. ამის შესახებ საქართველოს პრემიერ-მინისტრმა ნიკა გილაურმა ბათუმში გამართულ მთავრობის სხდომაზე განაცხადა.
მისი თქმით, სოფლის მეურნეობაში მნიშვნელოვანი თემაა შესანახი მეურნეობები, რომელთა მშენებლობა უკვე დასრულდა და 35 ათასი ტონა პროდუქციის დასაწყობების საშუალება გაჩნდა.
"აშენებულია 5 სასაწყობე მეურნეობა, რომელიც კერძო სექტორმა ააშენა, თუმცა მას ამისათვის მიწა სახელმწიფომ მისცა. რეალურად გლეხი მოყვანილ პროდუქციას ყიდდა იმ ფასად რაც იმ მომენტში იყო და ეს იყო ყველაზე დაბალი ფასი, რადგან არ არსებობდა შესანახი მეურნეობები. შესანახი მეურნეობა საშუალებას იძლევა შევინახოთ ჩვენი მოსავალი, რითაც შემცირდება იმპორტი. ეს კი თავიდან აგვარიდებს ფასების რყევებს", - განაცხადა პრემიერმა.
მისი თქმით, გარდა ამისა, ამას დაემატება რეგიონალური ლოჯისტიკური ცენტრები, სადაც წელიწადში 200 ათასი ტონა პროდუქციის შენახვა იქნება შესაძლებელი.
"ის გარდა შესანახი მეურნეობისა სხვა მომსახურეობასაც გაუწევს ფერმერს.
იმის მიზეზი რატომაც ქართული პროდუქცია ვერ გადის საზღვარგარეთის ბაზარზე არის ის, რომ არ არის სათანადო დაფასოება და ეს ცენტრები სწორედ ამ სახეობის მომსახურეობას გაუწევენ მეწარმეებს. ეს კი მნიშვნელოვანი ნაწილია იმისა რომ ახალი ბაზრები მოვიძიოთ", - განაცხადა გილაურმა და აღნიშნა, რომ ასევე მნიშვნელოვანი თემაა სანერგე და სადემონსტრაციო ნაკვეთების მოწყობა.
მისი თქმით, მთავრობას უნდა, რომ ასეთი ცენტრები ყველა რაიონში გაკეთდეს. პრემიერის ინფორმაციით პროექტის განხორციელება უკვე დაწყებულია - 15 უკვე აშენებულია და კიდევ 50 ასეთი ცენტრი დაემატება.
