დღეს, 25 ოქტომბერს, თბილისის საერთაშორისო აეროპორტის უბაჟო ვაჭრობის ზონაში - „დუტი ფრიში" "ატუ ჯორჯიასა" და "ტავ ჯორჯიას" მიერ საზეიმოდ ღვინის მაღაზია "ქართული ღვინოები" გაიხსნება, სადაც 12 კომპანიის მიერ წარმოებული სხვადასხვა დასახელების საუკეთესო ქართული ღვინო გამოიფინება. ქართული ღვინის ექსკლუზიური მაღაზიის გახსნა შესაძლებელი გახდა "ატუ ჯორჯიასა" და "ტავ ჯორჯიას" აქტიური ძალისხმევისა და სოფლის მეურნეობის სამინისტროს ინიციატივით. 275 კვ.მ-ზე განთავსებულ მაღაზიაში მუდმივად ექნება ადგილი ღვინის დეგუსტაციას და მგზავრებს 24 საათის განმავლობაში ექნებათ საშუალება დააგემოვნონ ქართული ღვინის დახვეწილი კოლექცია. მაღაზიის დიზაინი ქართულ ტრადიციულ სტილშია გადაწყვეტილი და ქართველ არქიტექტორს ეკუთუთვნის.
მრავალფეროვანი ასორტიმენტის ქართული ღვინის წარმოჩენა თბილისის აეროპორტში, სადაც ყოველდღიურად ათასობით მგზავრი იყრის თავს, არამარტო ქართული ღვინის პოპულარიზაციას შეუწყობს ხელს, არამედ ეროვნული ღვინის პროდუქციას შესაძლებლობას მისცემს ცნობადობა აიმაღლოს უამრავი ვიზიტორის თვალში.
მაღაზიაში წარმოდგენილი იქნება შემდეგი ღვინის კომპანიების ღვინოები: ბადაგონი, კორპორაცია ქართული ღვინო, შპს ხვანჭკარა, ქინძმარაულის მარანი, თბილღვინო, სარაჯიშვილი, თელიანი ველი, ბაგრატიონი 1882, შპს კახეთის ტრადიციული ღვინის წარმოება და სხვ.
ღონისძიებას მუსიკალურად გააფორმებს ანსამბლი "შვიდკაცა".
