მთავრობა 10-პუნქტიანი სტრატეგიული განვითარების გეგმის განახლებული ვერსიის პრეზენტაციას 2-3 კვირაში გამართავს. როგორც მთავრობის სხდომაზე პრემიერ-მინისტრმა ნიკა გილაურმა განაცხადა, 10-პუნქტიანი სტრატეგიული განვითარების გეგმა მნიშვნელოვანი დოკუმენტია, რითაც სხვადასხვა დარგის განვითარებისთვის მთავრობამ უნდა იხელმძღვანელოს.
სტრატეგიული გეგმის განახლება ხდება ყოველ 6 თვეში ერთხელ და სწორედ მორიგ განახლებულ ვერსიას მთავრობა საზოგადოებას უახლოეს 2-3 კვირაში წარუდგენს.
"10-პუნქტიანი სტრატეგიული განვითარების გეგმა ეს არის დეტალური სამოქმედო გეგმა, 2011-15 წლებში თუ რომელი მიმართულებით რას ვაკეთებთ. ეს ეხება ინფრასტრუქტურას, ენერგეტიკას, სოფლის მეურნეობას, ჯანდაცვას და სხვა სფეროებს. რეალურად, ეს არის სოციალურ-ეკონომიკური პოლიტიკის დოკუმენტი, რომლის განახლებაც საჭიროებს ყოველ 6 თვეში ერთხელ და განახლებისას მასში შედის ინფორმაცია, თუ რა გაკეთდა და რისი გაკეთებაა საჭირო უახლოეს პერიოდში. მთავრობა უკანასკნელი თვენახევრის განმავლობაში ინტენსიურად მუშაობდა 10-პუნქტიანი სამოქმედო გეგმის განახლებაზე", - განაცხადა ნიკა გილაურმა.
პრემიერ-მინისტრმა ჯანდაცვის მინისტრს აღნიშნული გეგმის პრეზენტაცია ჯანდაცვის მუშაკებთან ერთად უახლოესი 2 კვირის განმავლობაში დაავალა. ხოლო ფინანსთა მინისტრს აღნიშნული გეგმის განხილვას, პრემიერ-მინისტრის დავალებისამებრ, წამყვან ბიზნესმენებთან, ფინანსისტებთან და ინვესტორებთან მოუწევს. აღნიშნული გეგმის განხილვა დაევალა ასევე ინფრასტრუქტურის მინისტრსაც.
როგორც პრემიერ-მინისტრმა განმარტა, აღნიშნული გეგმის პრეზენტაცია უახლოესი 2-3 კვრის განმავლობაში მოხდება და საზოგადოებას დეტალურად გაიგებს უახლოესი 6 თვის განმავლობაში რა გეგმები აქვს მთავრობას და რა არის გასაკეთებელი.
მთავრობის სხდომაზევე პრემიერ-მინისტრმა სოფლის მეურნეობის ახალი მინისტრი წარადგინა და აღნიშნა, რომ ზაზა გოროზია მიუხედავად იმისა, რომ მისი გუნდის წევრია, მთავრობის სხდომას მთავრობის წევრის სტატუსით პირველად ესწრება. როგორც გილაურმა აღნიშნა, მან საკმაოდ რთული სამინისტრო ჩაიბარა და გოროზიას სამინისტროში უამრავი საქმის კეთება მოუწევს.
