ნავთობპროდუქტების მწარმოებელთა, იმპორტიორთა და მომხმარებელთა კავშირის თავმჯდომარე ვანო მთვრალაშვილის განცხადებით, კავშირი იწყებს საავტომობილო ზეთების ხარისხობრივ მონიტორინგს და აფრთხილებს მომხმარებლებს, ყურადღებით იყვნენ ავტომობილების სამანქანო ზეთის შეძენისას.
მისი თქმით, ჩვეულებრივად, ლეგალური გზით შემოსული დაბალი ხარისხის ზეთები ხშირად იმარჯვებენ ასევე სახელმწიფო თუ სხვა ორგანიზაციების მიერ გამოცხადებულ ტენდერებში, რადგან შედარებით მაღალი ფასის მქონე ხარისხიანი საავტომობილო ზეთები კონკურენციას ვერ უწევენ ამ უხარისხო დაბალფასიან ზეთებს. აქვე უნდა განვმარტოთ, რომ დაბალ ხარისხში ჩვენ ვგულისხმობთ პროდუქტს, რომელიც თავისი ფიზიკურ-ქიმიური მაჩვენებლებით არ შეესაბამება თავისივე სტანდარტს.
"იქიდან გამომდინარე, რომ ქვეყანაში არ ხორციელდება საავტომობილო ზეთების ხარისხობრივი კონტროლი, ზემოაღნიშნული პრობლემა მოუგვარებელი რჩება და უფრო მეტიც, მისი მასშტაბები კიდევ უფრო იზრდება", - აცხადებს მთვრალაშვილი და აღნიშნავს, რომ ყოველივე ამით დაზარალებულები არიან, პირველ რიგში, მომხმარებლები, რომელთაც ჰგონიათ, რომ ახორციელებენ მათთვის სასურველი ბრენდის საავტომობილო ზეთის შეძენას, თუმცა სინამდვილეში ყიდულებენ გაურკვეველი წარმოშობისა და ხარისხის საავტომობილო ზეთს.
"მნიშვნელოვან ზარალს ნახულობენ ასევე სახელმწიფო და სხვა ორგანიზაციები, რომლებიც ტენდერის მეშვეობით იძენენ საკმაოდ დაბალი ხარისხის საავტომობილო ზეთს. აღნიშნულმა ზეთმა შესაძლოა მნიშვნელოვანი ზიანი მიაყენოს ავტომობილის ძრავას და გამოიწვიოს მატერიალური ზარალი. ზემოაღნიშნული პრობლემა ხელს უშლის საავტომობილო ზეთების ბაზარზე კონკურენტუნარიანი გარემოსა და ჯანსაღი კონკურენციის დამკვიდრებას, იქიდან გამომდინარე, რომ უხარისხო დაბალფასიანი ზეთები მნიშვნელოვან ადგილს იკავებენ სამანქანო ზეთების რეალიზაციებში", - აცხადებს მთვრალაშილი.
