2011 წლის 26-30 სექტემბერს ბულგარეთის ქ. პლოვდივში გაიმართა საერთაშორისო ტექნიკური გამოფენა. ღონისძიება ყოველწლიურია და ტრადიციულად მოიცავს ისეთ სექტორებს, როგორიცაა მანქანათმშენებლობა, სატრანსპორტო სერვისი, მსუბუქი მრეწველობა, სამთო ინჟინერია, ელექტრო ინჟინერია, წყლის და განათების სისტემები. წლევანდელ გამოფენაზე განსაკუთრებულად ფართოდ იყო წარმოდგენილი მსოფლიოში აქტუალური დარგი - განახლებადი ენერგიის ეკოლოგიურად უსაფრთხო დანადგარები. პლოვდივის ტექნიკური გამოფენას წვლილი შეაქვს ადგილობრივი მრეწველობის სტიმულირებაში, რაც მთლიანობაში ხელს უწყობს ქვეყნის განვითარებას.
გამოფენაზე პროდუქცია წარმოადგინა 1000-ზე მეტმა კომპანიამ, რომლის მესამედი საზღვარგარეთიდან საგანგებოდ ჩამოვიდა (გერმანია, თურქეთი, რუსეთი, საბერძნეთი და სხვ.).
"პროკრედიტ ბანკი საქართველომ" 10 ერთგულ ბიზნესკლიენტს მისცა საშუალება დაეთვალიერებინათ გამოფენა და გაცნობოდნენ პოტენციურ ბიზნესპარტნიორებს. კლიენტების შერჩევა მათი საქმიანობის სფეროს მიხედვით მოხდა; ასევე ყურადღება გამახვილდა ისეთ მნიშვნელოვან ფაქტორებზე, როგორიცაა კლიენტის ლოიალურობა და ბანკთან ხანგრძლივი თანამშრომლობა.
ღონისძიების ორგანიზატორი "პროკრედიტ ბანკი ბულგარეთი" იყო, რომელმაც აღმოსავლეთ ევროპის პროკრედიტ ბანკების კლიენტები მიიწვია გამოფენაზე. "პროკრედიტ ბანკი - 10 წელი თქვენი ბიზნეს პარტნიორი", - ამ დევიზით ერთგვარად აღინიშნა პროკრედიტის 10-წლიანი მოღვაწეობა ბულგარეთის საბანკო სექტორში. საქართველოს გარდა მოწვეულთა შორის იყვნენ კოსოვოს, მაკედონიის, მოლდოვის, რუმინეთისა და სერბიის პროკრედიტ ბანკის კლიენტები.
გამოფენამდე სტუმრებს შესაძლებლობა ჰქონდათ ადგილზე მოენახულებინათ ბულგარეთის პროკრედიტ ბანკის 2 მსხვილი კლიენტის მოქმედი წარმოება.
ბულგარეთის პროკრედიტ ბანკი გამოფენაზე თავისი სტენდით იყო წარმოდგენილი. ბიზნესსაუზმეზე, რომელიც ღონისძიების დასკვნით დღეს გაიმართა, მოწვეულნი იყვნენ ასევე პროკრედიტ ბულგარეთის კლიენტები და ბიზნეს-პარტნიორები. ბანკის აღმასრულებელი დირექტორი პირადად მიესალმა დამსწრე საზოგადოებას, მადლობა გადაუხადა კლიენტებს ხანგრძლივი თანამშრომლობისათვის და იმედი გამოთქვა, რომ ბანკის სხვადასხვა ქვეყნების კლიენტების შეხვედრა ასეთ ხელსაყრელ გარემოში საფუძველს დაუდებდა მომავალში ნაყოფიერ თანამშრომლობას და საერთაშორისო ბიზნეს-ურთიერთობებს გაამყარებდა. სტუმრებს და მასპინძლებს შესაძლებლობა ჰქონდათ წარედგინათ თავისი კომპანია, გაეცვალათ საკონტაქტო ინფორმაცია და მოემზადებინათ ნიადაგი სამომავლო თანამშრომლობისათვის.
ლია შენგელია (საგა იმპექსი), პროკრედიტ ბანკის კლიენტი: "გამოფენა ძალიან მომეწონა. ჩემი კომპანიის მიმდინარე პროექტისთივს აუცილებელი ყველა კომპონენტის მომწოდებელი ვნახე. ყოველგვარ მოლოდინს გადააჭარბა. ბანკის დიდი მადლობელი ვარ."
საქმიანი ვიზიტის შემდეგ პროკრედიტ ბანკის კლიენტებს საშუალება ჰქონდათ დაეთვალიერებინათ ქალაქის ღირსშესანიშნაობები და ფეხით მოვლოთ პლოვდივის ისტორიული ნაწილი, რომელიც 6000 წელს ითვლის. საღამო კი და ფოლკლორული სანახაობის თანხლებით წარიმართა, რომლის დროსაც კლიენტები კიდევ უფრო უშუალო გარემოში გაეცნენ ერთმანეთს, ერთად დააგემოვნეს ბულგარული ტრადიციულ სამზარეულო და ჩაერთნენ საერთო მხიარულებაში.
პროკრედიტ ბანკი, როგორც მცირე და საშუალო ბიზნესის მომსახურე ბანკი, არა მხოლოდ მაღალი ხარისხის სრულ საბანკო მომსახურებას უწევს თავის კლიენტებს, არამედ ცდილობს, მათთვის დამატებითი ღირებულება შექმნას, ხელი შეუწყოს მათ შორის სასარგებლო ბიზნეს-ურთიერთობების დამყარებას და დაეხმაროს ახალი ბაზრების ათვისებასა და ახალი შესაძლებლობების აღმოჩენაში.
