21 ოქტომბერს, 14:00 საათზე, საქართველოს ეკონომიკისა და მდგრადი განვითარების სამინისტროში (მე-8 სართული) გაიმართება საქართველოს ელექტრონული საკომუნიკაციო ქსელებში ნუმერაციის ეროვნული სისტემის დანერგვის სამუშაოთა კოორდინაციის კომისიის გაფართოებული სხდომა და გადაწყვეტილი იქნება კონკრეტული ქმედებები რეფორმის მე-3 ფაზის წარმატებულად განხორციელებისთვის.
საქართველოს ეკონომიკის და მდგრადი განვითარების სამინისტროს მიერ წამოწყებული რეფორმა კავშირგაბმულობის დარგში, რომელიც ეხება ქვეყნის სატალეფონო ნუმერაციის ახალ ევროპულ სტანდარტებზე გადაყვანას, წარმატებულად მიმდინარეობს. ნოემბრის დასაწყისში დაგეგმილია აღნიშნული რეფორმის მე-3 ფაზის განხორციელების დაწყება, კერძოდ ქვეყნის ფიქსირებულ ადგილობრივ და მობილურ სატელეფონო ქსელებში მოქმედი 0X(X) ფორმატის მოკლე ნომრები შეიცვლება 1XX(XXX) ფორმატის მოკლე ნომრებით.
აღნიშნულთან დაკავშირებით შეიცვლება ექსტრემალური (საგანგებო) სამსახურების ტელეფონების არსებული მოკლე სპეციალური ნომრები და ისინი შემდეგი სახის იქნება:
სახანძრო - სამაშველო სამსახურის ტელეფონების ნომრები - 01 და 011, შეიცვლება ნომრით - 111;
სასწრაფო სამედიცინო დახმარების ტელეფონების ნომრები 03 და 033, შეიცვლება ნომრით - 113;
გაზის საავარიო სამსახურის ტელეფონის ნომერი - 04, შეიცვლება ნომრით -114;
საპატრულო პოლიციის ტელეფონის ნომერი - 022, შეიცვლება ნომრით - 122;
დაცვის პოლიციის ტელეფონის ნომერი - 025, შეიცვლება ნომრით - 125
ექსტრემალური (საგანგებო) სამსახურების გამოსაძახებლად ფიქსირებული ადგილობრივი და მობილური სატელეფონო ქსელების აბონენტების მიერ იკრიფება მხოლოდ გამოსაძახებელი სამსახურების მოკლე სპეცნომრები. (სახანძრო-სამაშველო სამსახური-111, სასწრაფო სამედიცინო დახმარება-113, გაზის საავარიო სამსახური-114, საპატრულო პოლიცია -122, დაცვის პოლიცია-125).
შეიცვლება ყველა სხვა ორგანიზაციების და სამსახურების ტელეფონების მოკლე ნომრები, რომლებიც ციფრი "0" -ით ან ციფრი "8"-ით იწყება, მათი და 1XX(XXX) ფორმატის ნომრების მქონე სხვადასხვა ორგანიზაციის და სამსახურების გამოძახების წესი შემდეგი იქნება:
იმ შემთხვევაში, თუ გამოსაძახებელი სამსახური ან/და ორგანიზაცია, ფიქსირებული ადგილობრივი და მობილური სატელეფონო ქსელების აბონენტები ერთი და იმავე ქალაქის ან/და მუნიციპალიტეტის ადმინისტრაციულ საზღვრებში მდებარეობენ, სატელეფონო ქსელების აბონენტების მიერ იკრიფება მხოლოდ გამოსაძახებელი სამსახურის მოკლე ნომერი;
იმ შემთხვევაში, თუ გამოსაძახებელი სამსახური ან/და ორგანიზაცია და ფიქსირებული ადგილობრივი და მობილური სატელეფონო ქსელების აბონენტები სხვა და სხვა ქალაქის ან/და მუნიციპალიტეტის ადმინისტრაციულ საზღვრებში მდებარეობენ, სატელეფონო ქსელების აბონენტების მიერ იკრიფება პრეფიქსი "8", იმ ქალაქის კოდი, სადაც გამოსაძახებელი სამსახური მდებარეობს და გამოსაძახებელი სამსახურის ნომერი.
გარდამავალ ეტაპზე, მიმდინარე წლის 9 ნოემბრიდან 28 ნოემბრამდე უზრუნველყოფილი იქნება ძველი 0X(X) ფორმატის და ახალი 1XX(XXX) ფორმატის მოკლე ნომრების თანამოქმედება, 8 ნოემბრიდან კი იმოქმედებენ მხოლოდ 1XX(XXX) ფორმატის მოკლე ნომრები.