ინტელექტუალური საკუთრების მსოფლიო ორგანიზაცია (ისმო) თავის წევრ ქვეყნებს აფხაზეთის უკანონო საპატენტო უწყებასთან თანამშრომლობის გამო გაფრთხილებას აძლევს.
ინტელექტუალური საკუთრების მსოფლიო ორგანიზაციამ 2011 წლის 19 ოქტომბერს ამ ორგანიზაციის წევრ ქვეყნებს ოფიციალურად დაუგზავნა საქართველოს პროტესტი ე.წ. აფხაზეთის რესპუბლიკის ინტელექტუალური საკუთრების განყოფილების უკანონო საქმიანობის შესახებ.
"საქპატენტის" საპროტესტო გამაფრთხილებელი წერილი ინტელექტუალური საკუთრების მსოფლიო ორგანიზაციას ჟენევაში გაეროს განყოფილებასთან და სხვა საერთაშორისო ორგანიზაციებთან საქართველოს მუდმივმა წარმომადგენლობამ გადასცა.
"საქპატენტის" ინფორმაციით, წერილი შეიცავს გაფრთხილებას, რომ დაინტერესებულმა პირებმა თავი შეიკავონ საქართველოს ოკუპირებულ ტერიტორიებზე უკანონო ქმედებებისგან. წერილში ასევე აღნიშნულია, რომ, საქართველოს კანონმდებლობის თანახმად, საქართველოს ტერიტორიაზე ერთადერთი უწყება, რომელიც გასცემს დამცავ დოკუმენტებს ინტელექტუალური საკუთრების ობიექტებზე, არის სსიპ საქართველოს ინტელექტუალური საკუთრების ეროვნული ცენტრი "საქპატენტი".
შესაბამისად, ე.წ. აფხაზეთის რესპუბლიკის ინტელექტუალური საკუთრების განყოფილების საქმიანობა არის უკანონო, მის მიერ გამოცემული ნებისმიერი აქტი უკანონოდ მიიჩნევა და სამართლებრივ შედეგს არ წარმოშობს. წერილს თან ერთვის ასევე საქპატენტის მიერ მოპოვებული ამ უწყების მიერ გაცემული ე.წ. "დამცავი დოკუმენტის" ასლი.
"საქპატენტმა" უკვე მიიღო წერილი ერთ-ერთი სერბული კომპანიისგან - ადგილობრივი იურიდიული კომპანიის ხელმძღვანელობა ბოდიშს იხდის მის ვებგვერდზე გავრცელებული ინფორმაციის გამო, რომლის თანახმადაც, აღნიშნული იურიდიული ფირმა პოტენციურ კლიენტებს აფხაზეთის საპატენტო უწყებაში სასაქონლო ნიშნების რეგისტრაციის მომსახურებას სთავაზობდა.
კომპანია "პეტოშევიჩის" ნიუ-იორკის ოფისის წარმომადგენელი ტანია დილიჩი წერილში იტყობინებოდა: "შეგიძლიათ იყოთ დარწმუნებული, რომ ჩვენ მიერ აქ http://www.petosevic.com/resources/news/2011/04/000644 განთავსებული ინფორმაცია არ წარმოადგენდა არანაირ პოლიტიკურ მიკერძოებას, არამედ მიზნად ისახავდა მომხმარებლების ინფორმირებას რეგიონში განხორციელებული ცვლილებების შესახებ. ვწუხვართ, თუ ეს ინფორმაცია არ იყო სწორი. აღნიშნულ საკითხთან დაკავშირებით წარმოშობილი ნებისმიერი შეკითხვის შემთხვევაში დაუყოვნებლივ მოგმართავთ მხოლოდ თქვენ, რათა ინფორმაციის პირველი წყარო იყოს მხოლოდ საქართველოს ხელისუფლება. ჩვენ განვაგრძობთ ინფორმაციის ვებგვერდიდან მოხსნას, ისე, რომ უკეთესად ავსახოთ ის გარემოებები, რაც თქვენს წერილში იყო მითითებული.
