მთავრობამ ქვეყნის ტურისტული რებრენდინგის განმახორციელებელი კომპანიის შერჩევა ვერ შეძლო. ამიზ მიზეზად კი ტურიზმის ეროვნული სააგენტოს დირექტორი მაია სიდამონიძე, სააგენტო "ჯი-ეიჩ-ენთან" საუბრისას, სათანადო განაცხადების არ არსებობას ასახელებს.
სიდამონიძე აცხადებს, რომ კომპანიებს განაცხადები სექტემბრის ბოლომდე უნდა შემოეტანათ და ამის შემდგომ მთავრობას უნდა ამოერჩია ის კომპანია, რომელიც ქვეყნის ტურისტულ რებრენდინგს განახორციელებდა, თუმცა მიზნის მიღწევა ვერ მოხერხდა.
"იმ კომპანიის განაცხადები, რომლებიც დღემდე მივიღეთ დამაკმაყოფილებელი არ იყო და ამიტომ განაცხადების მიღებას კვლავ განვაგრძობთ. განაცხადების მიღება სექტემბრის ბოლოს ამოიწურა, თუმცა რადგანაც არსებული კომპანიების შემოთავაზებები არ მოგვეწონა ვადა გავახანგრძლივეთ. ჩვენთვის მთავარია არა დრო არამედ ხარისხი. განაცხადების მიღება გაგრძელდება, მანამ, ვიდრე შესაბამის წინადადებებს არ მივიღებთ", - განუცხადა სააგენტო "ჯი-ეიჩ-ენს" სიდამონიძემ.
როგორც ცნობილია, ქვვეყნის ტურისტული რებრენდინგით 15-მდე ცნობილი სარეკლამო და ბრენდკომპანია იყო დაინტერესებული.
საქართველოს მთავრობის მხრიდან ქვეყნის ტურისტულ რებრენდინგის შესახებ ინფორმაცია რამდენიმე თვის წინ გაჟღერდა. მაშინ ტურისტული ეროვნული სააგენტოს ხელმძღვანელმა მაია სიდამონიძემ განაცხადა, რომ შეიცვლება ეროვნული სააგენტოს ლოგო. ასევე, განხორციელდება საერთაშორისო ბაზრებზე ქვეყნის რებრენდინგი და შემუშავდება სტრატეგია, რის მიხედვითაც ქვეყანა საკუთარ ტურისტულ პოზიციონირებას საერთაშორისო ბაზარზე მოახდენს.
"ტურიზმის ეროვნული სააგენტო რებრენდინგს გეგმავს, რომელიც გულისხმობს საქართველოს ბრენდის შემუშავებას, რომლის ფარგლებშიც მოხდება საქართველოს პოზიციონირება საერთაშორისო ბაზრებზე. ტურიზმის ეროვნულმა სააგენტომ და კომპანია L-C-D-მ ჩაატარა კველვა, რომლის მიედვითაც განისაზღვრება, თუ რა უნდა იყოს ჩვენი ბრენდშეტყობინება. თუ როგორ მოვახდენთ პოზიციონირებას და რა სეგმენტებზე იმუშავებს ჩვენი მარკეტინგული კამპანიის წარმოებისას. კვლევის მიხედვით, განისაზღვრება დავალება, რომლის შესრულებასაც ტურისტულ კომპანიებს ვთხოვთ თავიანთი მარკეტინგული კამპანიის წარმოებისას. კვლევის შედეგად, რომლის ფარგლებშიც გამოიკითხა როგორც ადგილობრივი ასევე უცხოელი ტურისტები, გამოიკვეთა სტუმართმოყვარეობა, ბუნებრივი ლანდშაფტი და ქვეყნის ექსკლუზიურობა", - განაცხადა მაია სიდამონიძემ.
მისივე თქმით, საქართველოს პოზიციონირება საერთაშორისო ბაზრებზე დღემეც ხდებოდა, თუმცა დროთა განმავლობაში საქართველოს ტურისტული მიმართულებები იქმნებოდა და, შესაბამისად დღის წესრიგშიც რებრენდინგის საკითხი დადგა, რომლის ფარგლებშიც რებრენდინგი ჩაუტარდება, როგორც ტურიზმის ეროვნულ სააგენტოს, ასევე მთლიანად საქართველოს ბრენდს.