13 ოქტომბერს საქართველოს ტექნიკური უნივერსიტეტის პირველ კორპუსში სასწავლო, სამეცნიერო და საექსპერტო ლაბორატორია იხსნება.ხვალვე, სტუ-ში გაიხსნება უახლესი ტექნიკით აღჭურვილი კომპიუტერული ცენტრი, რომელიც 300 სტუდენტზეა გათვლილი. აღნიშნული ცენტრი საქართველოში სიდიდით პირველია.

ღონისძიებას საქართველოს პრეზიდენტი მიხეილ სააკაშვილი დაესწრება. ლაბორატორიაში განთავსებულია 80-ზე მეტი დასახელების დანადგარი და აპარატურა, რომლებიც საშუალებას იძლევა, ფართოდ ასახოს თანამედროვე სამშენებლო ტექნოლოგიები უშუალოდ სასწავლო პროცესში. კერძოდ, შესაძლებელია 30-მდე ლაბორატორიული სამუშაოს განხორციელება საშენი მასალების, მასალათა გამძლეობისა და სამშენებლო კონსტრუქციების სასწავლო პროგრამების ფარგლებში. ამავე დროს, ლაბორატორიაში შესაძლებელია განხორციელდეს სამეცნიერო-კვლევითი და სამეურნეო სამუშაოები სამშენებლო ინდუსტრიის თანამედროვე მოთხოვნების გათვალისწინებით. კერძოდ, ლაბორატორიას აქვს როგორც პრაქტიკული დანიშნულების, ასევე კვლევითი ხასიათის სამუშაოების შესრულების პოტენციალი, მათ შორის: 1. კონკრეტულ სამშენებლო ობიექტზე გამოყენებული ბეტონების სიმტკიცის მახასიათებლების განსაზღვრა; 2. ინერტული მასალების ფრაქციული ანალიზი ევროპული სტანდარტით (ევროკოდები); 3. ცემენტის აქტივობის განსაზღვრა, მისი მარკის დადგენით; 4. ბეტონის რეცეპტის დამუშავება სხვადასხვა ქიმიური დანამატის გამოყენებით და მათი სიმტკიცის მახასიათებლების დადგენა; 5. ასფალტბეტონის ფიზიკურ-მექანიკური თვისებების განსაზღვრა; 6. არმატურის სიმტკიცის პარამეტრების დადგენა ნატურიდან აღებული ნიმუშების გამოცდით გაჭიმვაზე და ღუნვაზე; 7. რკინა-ბეტონის კონსტრუქციების გამოკვლევა; 8. შენობა-ნაგებობებისა და მათი ცალკეული ელემენტების გეოდეზიური პარამეტრების დადგენა.