დღეს, 12 ოქტომბერს, რუსი ოკუპანტების მიერ გადაკეტილი თეზი-ოკამის სარწყავი არხის პრეზენტაცია გაიმართება. როგორც შიდა ქართლის სამხარეო ადმინისტრაციაში აცხადებენ, პრეზენტაციას შიდა ქართლის გუბერნატორი გიორგი ტატიშვილი და სოფლის მეურნეობის მინისტრის მოადგილე გიორგი აბულაძე დაესწრებიან.
არხი 1956 წელს შევიდა ექსპლუატაციაში. იგი კასპის მუნიციპალიტეტის 4 ტერიტორიულ ორგანოს - ოკამის, სამთავისის, ლამისყანის და აღაიანის - 10 სოფელს (2700 ოჯახი, 13 000 ჰა მიწის ფართობი) ამარაგებდა. 2010 წლის ივნისში რუსმა ოკუპანტებმა გადაკეტეს არხი და 10 სოფლის მოსახლეობა რწყვის პერიოდში წყლის გარეშე დატოვეს. საქართველოს ხელისუფლების მცდელობის მიუხედავად, არხი დღემდე გადაკეტილია.
არხი სათავეს რუსი ოკუპანტების კონტროლირებადი ახალგორის რაიონის სოფელ ახმაჯში, მდინარე ქსნიდან იღებს და თვითდინებით მოედინება. სარწყავი არხის პარალიზებამ ადგილობრივი მოსახლეობა კრიზისულ პირობებში ჩააყენა.
პრობლემის მოსაგვარებლად საქართველოს ხელისუფლებამ ალტერნატიული გზა გამონახა და სოფელ თვაურებში, მდინარე ქსნის ნაპირზე, მოეწყო სატუმბი სადგური, რომელიც 1,5 კმ სიგრძის, ორ მწკრივად ჩალაგებული 700 მმ დიამეტრის მილების მეშვეობით მდინარის წყალს სარწყავ არხში გადაიტანს. მოეწყო ტრანსფორმატორიც.
აღნიშნული პროექტისთვის 1 500 000 ლარი გამოიყო. სამუშაო მიმდინარე წლის ივნისში დაიწყო და მასზე ადგილობრივი მოსახლეობა იყო დასაქმებული.