საქართველოს მთავრობის მიერ საინიციატივო წესით წარმოდგენილი კანონპროექტი "საქართველოს საგადასახადო კოდექსში ცვლილების შეტანის შესახებ" და მისი თანმდევი კანონპროექტები საბაჟო საწყობების რეორგანიზაციას ითვალისწინებს.
ახალი კანონმდებლობით მნიშვნელოვნად მარტივდება სასაწყობო მეურნეობის შექმნისა და ფუნქციონირების პირობები და პრინციპები, რაც მნიშვნელოვნად შეუწყობს ხელს კომპანიებს საქართველოში შემოტანილი ტვირთის დასაწყობებაში და მის შემდგომ რეექსპორტში.
ხდება ყველა ტიპის საწყობის გაერთიანება და უქმდება სასაქონლო ოპერაცია "თავისუფალი საწყობი". საგადასახადო კოდექსს ემატება დებულებები საწარმოს ახალი სტატუსის - სპეციალური სავაჭრო კომპანიის თაობაზე.
კანონპროექტი პარლამენტის საფინანსო-საბიუჯეტო კომიტეტმა დღეს მეორე მოსმენით განიხილა. საკომიტეტო განხილვაში მონაწილეობას იღებდნენ ბიზნესმენები, რომლებიც დაკავშირებული არიან სასაწყობო მეურნეობასთან. მათ თავიანთი მოსაზრებები და წინადადებები გამოთქვეს წარმოდგენილ პროექტთან დაკავშირებით, რასაც კანონმდებლები მესამე მოსმენისთვის გაითვალისწინებენ.
კიდევ ერთი კანონპროექტთა პაკეტი, რომელიც "საგადასახადო კოდექსში" და "საქართველოს სამოქალაქო კოდექსში" ცვლილებებს ითვალისწინებს, მიზნად ისახავს ლიზინგთან დაკავშირებული სამოქალაქო-სამართლებრივი რეგულაციების დახვეწას და მის სრულყოფილად ჩამოყალიბებას. დაწვრილებით რეგულირდება ლიზინგის მიმღების უფლებები და განისაზღვრება ქონების მიღების პროცედურები.
პირველი მოსმენით განხილული "ზოგიერთ საკანონმდებლო აქტში ცვლილებების შეტანის შესახებ" პროექტი "იარაღის შესახებ" და ასევე შინაგან საქმეთა სამინისტროს მომსახურების სააგენტოს საფასურების და ვადების შესახებ კანონში დაარეგულირებს ცხოველთა სამყაროს ობიექტების გარემოდან ამოღებასთნ დაკავშირებულ პროცედურებს და მექანიზმებს.
კომიტეტის წევრებმა დღევანდელ სხდომაზე განხილული საკითხების პლენარულ სხდომაზე განხილვას კენჭისყრით დაუჭირეს მხარი.
