ქუთაისს კიდევ ერთი განახლებული გამზირი შეემატება. საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა ქუთაისის ერთ-ერთი ყველაზე ხალხმრავალი ცენტრალური გამზირის - ჭავჭავაძის გამზირის სარეაბილიტაციო სამუშაო, პრეზიდენტის რწმუნებულთან იმერეთის რეგიონში ლაშა მაქაცარიასთან და ქუთაისის მერთან გიორგი თევდორაძესთან ერთად მოინახულა.
აღნიშნული პროექტი ჭავჭავაძის გამზირის რეკონსტრუქციას ითვალისწინებს.
სარეაბილიტაციაო სამუშაო დღეს დაიწყო. დაგეგმილია გამზირის გასწვრივ მდებარე კორპუსების რეაბილიტაცია და შენობების ფასადების მოპირკეთება. გზის სავალ ნაწილზე დაიგება ორფენიანი ასფალტ-ბეტონის საფარი. მოეწყობა სანიაღვრე არხები. ასევე, 6 კმ-იანი გამზირის ერთ მხარეს გაკეთდება თანამედროვე სტანდარტების შესაბამისი ველო-ბილიკი, რომელიც აღმაშენებლის გამზირზე მოწყობილ ველოტრასას შეუერთდება.
ველოსიპედებისთვის განკუთვნილ სავალ ნაწილზე ბეტონის საფარი დაიგება და სპეციალური ბორდოსფერი გამამაგრებელი ფენით დაიფარება. ქვეიტად მოსიარულეთათვის განკუთვნილი ტროტუარის ნაწილი კი ბეტონის ფილებით მოპირკეთდება. ბილიკის გასწვრივ, მოეწყობა რეკრეაციული ზონა, დასასვენებელი სკამებით და შესაბამისი გამწვანებით. ველობილიკზე დამონტაჟდება საგზაო ნიშნები. აღნიშნულ ტერიტორიაზე საერთაშორისო სტანდარტების შესაბამისი გარეგანათებები დამონტაჟდება.
პროექტი "რეგიონებში განსახორციელებელი პროექტების ფონდიდან" ფინანსდება და მას კოორდინირებას რეგიონული განვითარებისა და ინფრასტრუქტურის სამინისტრო უწევს. სარეაბილიტაციო სამუშაოზე 100-მდე ადამიანი დასაქმდება, რომელთა უმრავლესობა ადგილობრივი მოსახლეობა იქნება.
