მტო-ის გენერალურ ასამბლეაზე ორგანიზაციის გენერალური მდივანი ტალებ რიფაი დელეგატების წინაშე წარდგა 2010-2011 წლებში მსოფლიო ტურიზმის ორგანიზაციის მიერ განხორციელებული საქმიანობისა და საერთაშორისო ტურიზმის ტენდენციების ანგარიშით. სხვა საკითხებთან ერთად განიხილება 2012-2013 წლების პროექტებიც, რომელშიც საქართველო აქტიურად იქნება ჩართული.
გენერალური ასამბლეის ფარგლებში 9 ოქტომბერს გაიმართა მსოფლიო ტურიზმის ორგანიზაციის ევროპის რიგით 53-ე რეგიონული კომისია. ეს შეხვედრა საქართველოსთვის ისტორიული და უაღრესად მნიშვნელოვანი იყო. მსოფლიო ტურიზმის ორგანიზაციის ევროპის წევრმა ყველა სახელმწიფომ საფრანგეთთან ერთად ერთხმად აირჩია საქართველო გაეროს მსოფლიო ტურიზმის ორგანიზაციის ევროპის რეგიონული კომისიის ვიცე-თავმჯდომარედ, რაც ნიშნავს, რომ ტურიზმის სფეროში ევროპის რეგიონის მასშტაბით საქართველო ხდება ლიდერი სახელმწიფო ერთიანი პოლიტიკის განსაზღვრისა და წარმართვის თვალსაზრისით. საქართველო შეასრულებს უმნიშვნელოვანეს როლს საერთოევროპული პროექტების განხორციელების მიმართულებით. ამავე სხდომაზე საბოლოოდ გადაწყდა 2012 წლის გაზაფხულზე მსოფლიო ტურიზმის ორგანიზაციის ევროპის რეგიონული კომისიის 54-ე შეხვედრისა და საერთაშორისო კონფერენციის საქართველოში ჩატარების საკითხი.

გენერალური ასამბლეის ფარგლებში საქართველო აირჩიეს მსოფლიო ტურიზმის სტატისტიკის კომიტეტის წევრად, რაც იმას ნიშნავს, რომ საქართველო შეასრულებს აქტიურ როლს ტურიზმის სტატისტიკის სისტემის გაუმჯობესების, ახალი რეკომენდაციების შემუშავებისა და სტატისტიკური კვლევის მეთოდოლოგიის გაუმჯობესების კუთხით. ყოველივე ეს მნიშვნელოვნად შეუწყობს ხელს საქართველოში ტურიზმის სფეროში სტატისტიკური აღრიცხვიანობის სისტემის გაუმჯობესებას.

გენერალური ასამბლეის ფარგლებში გაიმართა ტურიზმის მინისტრებისა და "აბრეშუმის გზის~ წევრი სახელმწიფოების შეხვედრა, რაც საკმაოდ პროდუქტიული იყო საქართველოსთვის.