ამერიკულმა კომპანია Apple-მა ერთ დღე-ღამეში ერთ მილიონ სმარტფონ iPhone 4S-ზე მიიღო შეკვეთა, რომელიც 14 ოქტომბერს აშშ-ს გარდა მსოფლიოს ექვს ქვეყანაში გაიყიდება. ახალმა სმარტფონმა, iPhone 4-ის რეკორდი უკვე მოხსნა, რომელიც გაყიდვაში 15 თვის უკან გამოვიდა. გასულ წელს, დღე-ღამეში 600 ათას ერთეულ iPhone 4-ზე გაკეთდა შეკვეთა.
iPhone 4S-ის პრეზენტაცია 4 ოქტომბერს შედგა, თუმცა მისი გაყიდვა 14 ოქტომბრიდან დაიწყება. პირველ რიგში სმარტფონის ახალი მოდელი გაიყიდება აშშ-ში, ავსტრალიაში, კანადაში, საფრანგეთში, გერმანიაში, იაპონიასა და დიდ ბრიტანეთში. ნოემბრის დასაწყისიდან კი iPhone 4S-ის გაყიდვა ევროპის 22 ქვეყანაში დაიწყება.
შეგახსენებთ, რომ ანალიტიკოსები და ფინანსისტები Apple-ს მიერ iPhon 5-ის პრეზენტაციას ელოდნენ, თუმცა საბოლოოდ კომპანიამ ბაზარზე iPhone 4-ის განახლებული ვერსია გამოიტანა.
