თსუ-ის ეკონომიკის საერთაშორისო სკოლამ (ISET) საქართველოს ფინანსთა მინისტრს, დიმიტრი გვინდაძეს უმასპინძლა. მინისტრმა ISET-ის სტუდენტებისთვის ჩაატარა ლექცია თემაზე: "საქართველოს ეკონომიკური ზრდის ტენდენციები".
ფინანსთა მინისტრმა ISET-ის სტუდენტებს მიაწოდა ინფორმაცია ფისკალურ პოლიტიკაზე, ბიუჯეტის პარამეტრებზე, მიმდინარე დადებით მაკროეკონომიკურ დინამიკაზე საქართველოში, მთლიანი შიდა პროდუქტის ზრდის ტემპებზე და სტრუქტურულ რეფორმებზე.
"ISET-ში იზრდებიან ძალიან კარგი ეკონომისტები. სკოლა დაარსდა 5 წლის წინ და აქ სწავლობენ სტუდენტები საქართველოდან, სომხეთიდან და აზერბაიჯანიდან. სკოლის ამ რეგიონულ ხასიათს ძალიან დიდი მნიშვნელობა აქვს. სტუდენტები სწავლობენ საუკეთესო პროგრამით. შეიძლება ითქვას, რომ ყველაფერ იმას, რასაც ახალგაზრდა ეკონომისტები სწავლობენ აშშ-სა და ევროპის წამყვან უნივერსიტეტებში ისწავლება თბილისის ეკონომიკის საერთაშორისო სკოლაში. ISET-ი ჩამოყალიბდა როგორც კადრების სამჭედლო, მათ შორის, ფინანსთა სამინისტროსთვის, ეროვნული ბანკისთვის, სხვადასხვა სახელმწიფო და კერძო ორგანიზაციისთვის. მომავალში ფინანსთა სამინისტროსა და ISET-ს შორის დიალოგი გაგრძელდება და გაღრმავდება. მინდა მადლობა გადავუხადო ყველას - სტუდენტებს, რომლებიც კარგად სწავლობენ და ლექტორებს, რომლებიც კარგად ასწავლიან", - განაცხადა ფინანსთა მინისტრმა.
"დიმიტრი გვინდაძე თსუ ეკონომიკის საერთაშორისო სკოლის მმართველთა საბჭოს წევრია, სკოლის დაარსების დღიდან და ჩვენი კარგი მეგობარი და პარტნიორია. იგი გვეხმარება იმ პროექტების განხორციელებაში, რის შედეგადაც აქ იზრდებიან ნიჭიერი და წარმატებული ეკონომისტები. იმედი მაქვს, ჩვენი თანამშრომლობა მინისტრთან სტუდენტებთან შეხვედრის შემდეგ უფრო გამყარდება", - განაცხადა ერიკ ლივნიმ, ISET-ის აღმასრულებელმა დირექტორმა.
მისი განცხადებით, სტუდენტებთან დიალოგი შესაძლებლობას იძლევა ახალგაზრდა თაობა უფრო აქტიურად იყოს ჩართული ქვეყნის მართვის პროცესში, იცოდეს მეტი მთავრობის მიერ განხორციელებული ეკონომიკური პოლიტიკისა და გატარებული რეფორმების შესახებ.
ეკონომიკის საერთაშორისო სკოლა (ISET) დაარსდა 5 წლის წინ საქართველოს მთავრობის ინიციატივითა და რამდენიმე საერთაშორისო დონორის (მსოფლიო ბანკი, შვედეთის საერთაშორისო განვითარებისა და თანამშრომლობის სააგენტო (შიდა), ბრითიშ პეტროლიუმი (BP), ფონდი "ღია საზოგადოება", ნორვეგიის საგარეო საქმეთა სამინისტრო და გერმანიის მთავრობა) ხელშეწყობით. ISET-ის ძირითადი მისიაა ეკონომისტთა ახალი თაობების აღზრდა სამხრეთ კავკასიის ქვეყნებისათვის, ეკონომიკის სწავლებისა და კვლევების თანამედროვე მიდგომების დანერგვა ჩვენს რეგიონში. სკოლა ქართველ, აზერბაიჯანელ და სომეხ სტუდენტებს სთავაზობს ორწლიან სამაგისტრო პროგრამას ეკონომიკაში. ლექტორები მოწვეულები არიან ჩრდილოეთ ამერიკის, დასავლეთ ევროპისა და ისრაელის უნივერსიტეტებიდან. ამ დროისთვის ეკონომიკის საერთაშორისო სკოლა დაამთავრა 95 სტუდენტმა, რომელთაგან დიდი ნაწილი მუშაობს საჯარო სექტორში, მათ შორის საქართველოს ფინანსთა სამინისტროში, ეროვნულ ბანკსა და სტატისტიკის დეპარტამენტში. საუკეთესო კურსდამთავრებულების ნაწილი სწავლას აგრძელებს დასავლეთის უნივერსიტეტების სადოქტორო პროგრამებში.