4 ნოემბრიდან დუბაიში ჩაფრენა 270 დოლარიდან არის შესაძლებელი. როგორც დღეს სასტუმრო Holliday Inn-ში გამართულ, Fly Dubai-სა და საქართველოში მისი ავტორიზებული დისტრიბუტორის Dubai.ge-ს ერთობლივი პრეზენტაციაზე ითქვა, 4 ნოემბრიდან Fly Dubai საქართველოში რეგულარულ რეისებს თბილისი-დუბაი-თბილისის მიმართულებით კვირაში ორჯერ შეასრულებს. გრენები დუბაიდან საქართველოს მიმართულებით ორშაბათსა და პარასკევს განხორციელდება, ხოლო თბილისიდან დუბაის მიმართულებით - სამშაბათსა და შაბათს.
საქართველოში Fly Dubai-ის ავტორიზებული დისტრიბუტორის Dubai.ge-ს ხელმძღვანელი მარი ჩირინაშვილი აცხადებს, რომ Fly Dubai-ის მგზავრებს კომპანიისგან დამატებითი სერვისების მიღებაც შეეძლებათ.
"პირდაპირი ავიარეისების დანიშვნა კარგი საშუალებაა იმისთვის, რომ საქართველოს მოქალაქეებისთვის გაიაფდება გადაფრენა გაერთიანებული ემირატებისა და შუა აზიის მიმართულებით. ვიმედოვნებთ, რომ ტურისტული მიზნით, საქართველოს მიმართ მოთხოვნა გაიზრდება. იმავდროულად, ინვესტორებიც დაინტერესდებიან საქართველოში შემოსვლით", - აცხადებს საქართველოში Fly Dubai-ის ავტორიზებული დისტრიბუტორის Dubai.ge-ს ხელმძღვანელი მარი ჩირინაშვილი.
ჩირინაშვილის თქმით, ფრენების ღირებულება იწყება 270 დოლარიდან და აღნიშნულ ფასში შედის მგზავრობის ტარიფი და აეროპორტის მოსაკრებელი. "ბილეთის ფასი განთავსებულია ყველა დამატებითი ღირებულებისგან და ფასში შედის 7 კგ. ხელბარგი. თუ მგზავრს სურს დამატებითი მომსახურეობის მიღება, ამის საშუალება ბორტზე არსებობს, რადგანაც Fly Dubai-ს ყველა თვითმფრინავი აღჭურვილი თაჩსქრიმ ეკრანებით, ასევე არის ონლაინ მენიუთი", - აცხადებს Dubai.ge-ს დირექტორი.
ბიზნესომბუსდმენი გიორგი პერტაია კი ამბობს, რომ ბაზარზე ახალი კომპანიების შემოსვლით კონკურენცია გაიზრდება, რაც საბოლოოდ დაბალ ტარიფებს განაპირობებს.
"ახალი ავიაკომპანიის შემოსვლა მნიშვნელოვანია, რადგანაც Fly Dubai-ს აქვს დაბალი ფასები და მაღალი ხარისხი. მნიშვნელოვანია, რომ იზრდება კონკურენცია ამ სფეროში, რაც ხელს შეუწყობს, როგორც ინვესტორების ისე ტურისტების მოზიდვას. დღეს დუბაიში ჩასვლა საკმაოდ დაბალ ფასადაა შესაძლებელი"- აცხადებს "ჯი-ეიჩ-ენთან" საუბრისას გიორგი პერტაია.
"ზოგადად პირდაპირი ავიარეისების დანიშვნა სხვადასხვა ქვეყანასთან ძალიან მნიშვნელოვანია, რათა ტურისტების ნაკაადმა მომატოს და რაც უფრო მეტი მიმართულებით იქნება რეისები მით უკეთესია. დუბაი საქართველოსთვის ერთ-ერთი მნიშვნელოვანი ბაზარია და ამიტომ მნიშვნელოვანი ეტაპი იწყება იმ მიმართულებით, რომ ტურისტების რაოდენობა გაიზარდოს. დუბაიდან შემოსული ვიზიტორების რაოდენობა 30-35 %-ითაა გაზრდილი", - განუცხადა სააგენტო "ჯი-ეიჩ-ენს" ტურიზმის ეროვნული სააგენტოს ხელმძღვანელმა მაია სიდამონიძემ.
შეგახსენებთ, რომ Fly Dubai 2008 წელს დაარსდა და Emirate Airline-ის შვილობილი კომპანიაა, რომელიც რეისებს მსოფლიოს 45 ქვეყნის მიმართულებით ასრულებს. კომპანია მომხმარებელს დაბალ ფასსა და მომსახურების მაღალ ხარისხს სთავაზობს. Fly Dubai-ის 189-ადგილიანი ახალი თაობის ბორტი ბოინგი 737-800 აქვს, რომელიც აღჭურვილია უახლესი HD სენსორული ეკრანებითა და რეკაროს ბრენდის თანამედროვე სავარძლებით.