საქართველოს სოფლის მეურნეობის მინისტრი საქმიანი ვიზიტით კიშინიოვში იმყოფებოდა, სადაც რამდენიმე სამუშაო შეხვედრა გამართა. დელეგაცის შემადგენლობაში, რომელსაც ბაკურ კვეზერელი ხელმძღვანელობდა, ასევე ვაზისა და ღვინის დეპარტამენტის უფროსი ვასილ მანაგაძე, ბიზნესმენები და საქართველოს პარლამენტის წევრები შედიოდნენ.
სოფლის მეურნეობის მინისტრმა ბაკურ კვეზერელმა შეხვედრა მის მოლდაველ კოლეგასთან, ვასილე ბუმაკოვთან გამართა. შეხვედრის მთავარი თემა, ორ ქვეყანას შორის სოფლის მეურნეობის დარგში ურთიერთთანამშრომლობის გაღრმავება და გამოცდილების ურთიერთგაზიარება იყო. გარდა ამისა, ბაკურ კვეზერელმა ვასილე ბუმაკოვი თბილისშიც დაპატიჟა.
,,საქართველომ დიდ წარმატებებს მიაღწია ღვინის ბაზრების დივერსიფიკაციის კუთხით და ამიტომ, ჩვენთვის ძალიან საინტერესო იყო მინისტრისგან იმ ღონისძიებების შესახებ მოსმენა, რომლებმაც საბოლოოდ განაპირობა ქართული ღვინის ექსპორტის ბაზრების დივერსიფიკაცია. ჩვენ, ბევრ სხვა თემაზეც ვისაუბრეთ და ვფიქრობთ, რომ თანამშრომლობის გაღრმავება ორივე მხარისთვის მნიშვნელოვანი და მომგებიანი იქნება," - განაცხადა მოლდავეთის სოფლის მეურნეობის მინისტრმა ვასილე ბუმაკოვმა.
საქართველოს სოფლის მეურნეობის მინისტრის თქმით, მოლდავეთის სოფლის მეურნეობის მინისტრი დაინტერესდა საქართველოში ბოლო წლების განმავლობაში გატარებული რეფორმებით, არა მხოლოდ სოფლის მეურნეობის სექტორში. ,,მოლდავეთის სოფლის მეურნეობის მინისტრს მივაწოდეთ ინფორმაცია გატარებული რეფორმების შესახებ. ჩვენ მათ გავაცანით გარკვეული მონაცემები და სტატისტიკა. მოლდავეთის დელეგაცია უახლოეს თვეებში ეწვევა საქართველოს, რათა დეტალურად შეისწავლონ ის რეფორმები რომლებიც განხორციელდა ბოლო წლების განმავლობაში. მათ აქვთ ინტერესი, რომ კონკრეტულად შეისწავლონ გატარებული რეფორმები ვეტერინარიის და ფიტისანიტარული კუთხით," - განაცხადა ბაკურ კვეზერელმა.
