"ჩვენს ხელთ არსებული ინფორმაციით, არსებობს შეკვეთა ნიკოლაი მელნიჩენკოს ფიზიკური ლიკვიდაციის შესახებ იმ ადამიანების მხრიდან, რომლებსაც მისი საქციელი არ მოსწონთ. ასევე განიხლებოდა მისი დაკავების ვარიანტი, რის შემდეგაც მას საგამოძიებო იზოლატორში მოათავსებდნენ, იქიდან კი იგი უკვე ვეღარ გამოვიდოდა, იმის გამო, რომ თითქოს სიცოცხლეს თვითმკვლელობით დაასრულებდა ან უბედური შემთხვევის შედეგად გარდაიცვლებოდა", _ აცხადებს ნედილკო.

უკრაინის სახელმწიფო დაცვის სამმართველოს ექს-მაიორმა ნიკოლაი მელნიჩენკო ცნობილი იყო იმ ჩანაწერების წყალობით, რომელიც მან უკრაინის ექს-პრეზიდენტის ლეონიდ კუჩმას კაბინეტში გააკეთა. ჩანაწერების შინაარსმა საშუალება მისცა ოპოზიციას კუჩმა ჟურნალისტ გიორგი ღონღაძის მკვლელობაში დაედანაშაულებინათ. 2001-2004 წლებში ნიკოლაი მელნიჩენკოს მიმართ რამდენიმეჯერ სისხლის სამართლის საქმე აღიძრა, რომლებშიც მას ბრალი თანამდებობრივი უფლებამოსილების გადაჭარბებაში და სახელმწიფო საიდუმლოს გამჟღანებაში ედებოდა. ეს საქმეები 2005 წელს გენპროკურორმა სვიატოსლავ პისკუნმა დახურა, თუმცა მიმდინარე წლის ივნისში პეჩორის რაიონულმა სასამართლომ გააუქმა ეს დადგენილება, ხოლო ივლისის ბოლოს სააპელაციო სასამართლომ ეს გადაწტყვეტილება დაადასტურა.

"ბოლო დროს მელნიჩენკო და მისი ოჯახის წევრები უკრაინის უშიშროების საბჭოს წარმომადგენელთა მეთვალყურეობის ქვეშ იმყოფებოდნენ", _ აცხადებს ადვოკატი და არც იმას გამორიცხავს, რომ მელნიჩენკოს შესაძლოა ჩეხური პასპორტიც ჰქონდეს.

მისივე თქმით, "როდესაც ცხადი გახდა, რომ მას საფრთხე ემუქრება მასთან მოვიდნენ ძალიან მაღალჩინოსანი ძალოვნები და უთხრეს - "აი პასპორტი, წადი ქვეყნიდან". გავრცელებული ინფორმაციით, ექს-მაიორს ამ წინადადებით არ უსარგებლია, ვინაიდან იგი პროვოკაციად ჩათვალა - იგი შესაძლოა საზღვრის გადაკვეთისას ყალბი პასპორტის გამო დაეკავებინათ, დაეპატიმრებინათ ან მოეკლათ დაკავებისას.

"ამჟამად მელნიჩენკო "საიმედო ადგილზე" იმყოფება - მისი ამოცანა ლეონიდ კუჩმას სასამართლომდე მიღწევაა, სადაც იგი მოწმის სტატუსით გამოსვლას აპირებს", _ აცხადებს ადვოკატი.