ქართულ საზოგადოებას არავისი, არც ჩემი და არც სხვისი განმარტებები არ სჭირდება იმდენად ნათელი იყო საფრანგეთის პრეზიდენტის გზავნილი,- განაცხადა უშიშროების საბჭოს მდივანმა გიგა ბოკერიამ საფრანგეთის პრეზიდენტის ნიკოლა სარკოზის მიერ გაკეთებული განცხადებების კომენტირებისას.
"ქართულ საზოგადოებას არავისი, არც ჩემი და არც სხვისი განმარტებები არ სჭირდება იმდენად ნათელი იყო გზავნილი. მე მგონი, ყველაფერზე მთავარი არის ის არჩევანი, რომელიც ქართულ საზოგადოებას აქვს გაკეთებული", _ განაცხადა ბოკერიამ და აღნიშნა, რომ საქართველოს მიერ არჩეულ თავისუფალი სამყაროსა და ევროპის გზაზე ბარიერები არსებობს, ამიტომაც საქართველოს ძლიერი მოკავშირეები სჭირდება.
"დღეს ერთ-ერთი დიდი ქვეყნის, ძლიერი ევროპული ქვეყნის პრეზიდენტი გამოდიოდა სიტყვით. რაც მე ყველაზე უფრო მკაფიოდ დამამახსოვრდა იყო ის, რომ ის თავს ისე გრძნობს საქართველოში, რომ არის ევროპაში. ჩვენ ყველანი ასე ვგრძნობთ თავს, მაგრამ ეს იმას არ ნიშნავს, რომ გზა კიდევ გასავლელი არ გვაქვს", _ განაცხადა ბოკერიამ და ნიკოლა სარკოზის მიერ გაკეთებულ კიდევ ერთ განცხადებაზე გაამახვილა ყურადღება.
"გასაგებია ვის საპასუხოდ ითქვა, რომ საბჭოთა კავშირი ვერასოდეს ვერ აღდგება და იმ თავისუფალ არჩევანს, რომელსაც ნებისმიერი თავისუფლებისმოყვარე მოყვარე ერი აკეთებს წინ ვერაფერი ვერ აღუდგება", _ განაცხადა ბოკერიამ.
