პოლიტილოგ რამაზ საყვარელიძის თქმით, საფრანგეთის პრეზიდენტმა ნიკოლა სარკოზიმ დღევანდელი სიტყვით გამოსვლისას ხაზი გაუსვა, რომ შექმნილ სიტუაციაში პასუხისმგებლობა საქართველოსაც და რუსეთსაც ეკისრება.
"ის აქცენტები რაც გაკეთდა, რომ საჭიროა დიალოგი, საჭიროა მოიხსნას დაპირისპირების რიტორიკა, ეს უდავოდ ეკუთვნის როგორც ერთ, ისევ მეორე მხარეს. სარკოზი ხაზს უსვამდა, რომ ორივე მხარის პასუხისმგებლობა დგას შექმნილ სიტუაციაში. ქართული პოლიტიკისთვის ასე არ ჟღერს, ხოლმე. ჩვენ ძირითადად რუსული მხარის პასუხისმგებლობაზე ვაკეთებთ ხოლმე აქცენტს. ამ მხრივ კრიტიკული მომენტი იყო. იყო კიდევ კრიტიკული მომენტი, შეიძლება ითქვას კეთილი შენიშვნაც, იმაში, რომ საქართველო უნდა იყოს ისეთი ქვეყანა, რომელიც აფხაზებისთვის და ოსებისთვის იქნება არა იზოლირებული, არამედ ღია და თავისუფალი ქვეყანა", - განაცხადა საყვარელიძემ "ჯი-ეიჩ-ენთან" საუბრისას.
საყვარელიძე მიიჩნევს, რომ სარკოზის სიტყვა, რომელიც საფრანგეთის პრეზიდენტმა თავისუფლების მოედანზე წარმორთქვა, შესანიშნავი.
"აქცენტები, რომელიც საქართველოს პრეზიდენტმა გააკეთა, ჩვენთვის თავიდანვე ცნობილი და მოსალოდნელი იყო. ბუნებრივია, სიახლეს ველოდით სარკოზის გამოსვლისაგან. სიმართლე გითხრათ, ჩემთვის ბევრი რამ იყო დამაინტრიგებელი. არ ველოდი, რომ ასეთ დიდ ადგილს დაუთმობდა 2008 წლის მოვლენებს. სარკოზიმ მოახერხა ძალიან მოქნილი და გონებამახვილი რიტორიკის გამოყენებით, აქცენეტები ისე გაეკეთებინა, რომ რუსეთთან დაპირისპირებად ეს არ აღქმულიყო. მან გააკეთა მოწოდება თანამშრომლობაზე, დიალოგზე. მაგალითად საფრანგეთის და გერმანიის ურთიერთობაც მოიყვანა მეორე მსოფლიო ომის შემდეგ, რამაც უნდა შექმნას ნორმალური განვითარება, საფუძველი როგორც ერთი, ასევე მეორე ქვეყნისთვის. ამ პოზიციას ვერ მოედავება რუსეთი, და ალბათ საქართველოსთვისაც უდავოდ მისაღები პოზიცია არის. შესანიშნავად დაწერილი სიტყვა იყო", - განაცხადა საყვარელიძემ.
