რუსეთის ფედერაცია მიესალმება ტუვალუს გადაწყვეტილებას რუსეთის, ვენესუელას, ნიკარაგუას, ვანუატუსა და ნაურუს მსგავსად აფხაზეთთან და ე.წ. სამხრეთ ოსეთთან დიპლომატიური ურთიერთობების დამყარების შესახებ. განცხადებას ამის შესახებ რუსეთის საგარეო საქმეთა სამინისტრო დღეს აქვეყნებს.
"მოსკოვი მიესალმება ტუვალუს სუვერენულ გადაწყვეტილებას - დაამყაროს დიპლომატიური ურთიერთობები ახალგაზრდა კავკასიურ სახელმწიფოებთან - აფხაზეთისა და სამხრეთ ოსეთის რესპუბლიკებთან. ტუვალუს მხარის მიერ გადადგმული ეს ნაბიჯი ამყარებს აფხაზეთისა და სამხრეთ ოსეთის საერთაშორისო-სამართლებრივ მდგომარეობას", _ ნათქვამია რუსეთის საარეო საქმეთა სამინისტროს მიერ გავრცელებულ განცხადებაში.
შეგახსენებთ, რომ წყნარი ოკეანის კუნძულოვანმა სახელმწიფო ტუვალუმ ე.წ. დიპლომატიური ურთიერთობები მიმდინარე წლის 18 სექტემბერს აფხაზეთთან დაამყარა, ხოლო 19 სექტემბერს - ე.წ. სამხრეთ ოსეთთან.
