ენერგეტიკისა და ბუნებრივი რესურსების მინისტრი გამორიცხავს, რომ რუსული "ინტერ რაო ეესი" ქართულ ენერგეტიკაში მონოპოლისტი გახდეს. როგორც ალექსანდრე ხეთაგურმა განმარტა, არც რუსულ და არც სხვა ქვეყნის კომპანიას, ქართული კანონმდებლობით, არ აქვთ საშუალება, რომ დომინატის ფუნქცია შეასრულონ და ქვეყნის ენერგოპოლიტიკა დააზარალონ.
"დომინანტი ენერგეტიკაში, რომელიმე კომპანია, ან ქვეყანა ვერ გახდება. საქართველოს პარლამენტს დამტკიცებული აქვს ენერგეტიკული პოლიტიკა და განსაზღვრულია თუ ერთი კომპანიის ხელში რამდენი ენერგიის გამომუშავება, ან მოხმარება უნდა მოხდეს, რათა ბაზარზე ეს კომპანია სრული მონოპოლისტი არ გახდეს", - განმარტა მინისტრმა.
ხეთაგურმა საილუსტრაციოდ "ყაზტრანსგაზ თბილისის" მაგალითი მოიყვანა, როდესაც ლიცენზიის პირობების დარღვევის გამო, კომპანიაში დროებითი მენეჯმენტი შევიდა.
"დაირღვა თუ არა ლიცენზიის პირობა, მაშინვე მარეგულირებელი კომისიისა და სასამართლოს გადაწყვეტილებით, "ყაზტრანსგაზ თბილსიში" დროებითი ადმინისტრაცია შევიდა. სემეკი არის ზედამხედველი ლიცენზიის პირობების შესრულებისა და თუ კი რომელიმე კომპანია დაარღვევს ლიცენზიის პირობას, ლიცენზიის პირობა კი არის უწყვეტი გაზ ან ელეტრომომარაგება, სამართლიანობის დაცვა და საფასურის გადახდა, ამ ნებისმერი პირობის დაღვევისათვის, საქართველოს კანონმდებლობა იძლევა საშუალებას, რომ კომპანიაში, მიუხედავად მისი საკუთრების ფორმისა, შეიყვანოს დროებითი ადმინისტრაცია და განახორციელოს კომპანიის მენეჯმენტი. და ეს მოხდება მანამ ვიდრე თითოეული ლიცენზიის პირობები არ იქნება დაცული. თუ კი ეს განხორციელდა ყაზახური სახელმწიფო კომპანიის მიმართ, რატომ არ შეიძლება ეს განხორციელდეს რუსეთის სახელმწიფო კომპანიის მიმართ? არამგონია გადაწყვეტილების გამოტანისას, მარეგულირებელმა კომისიამ შეხედოს, თუ რომელი სახელმწიფოს მფლობელობაშია ესა თუ ის ლიცენზია. აქ ამოსავალი წერტილი ლიცენზიის პირობების დაცვაა", - განმარტა ხეთაგურმა.
მინისტრის თქმით, რუსულმა "ინტერ რაო ეესმა" რუსეთ-საქართველოს ომის დროს პირნათლად შეასრულა ლიცენზიის პირობები და მისი მხრიდან რაიმე კონკრეტული ზიანის მიყენება ქართული ენერგეტიკის მიმართ არ დაფიქსირებულა.
"რუსეთ-საქართველოს ომის დროს გათიშვა არ ყოფილა და "მტკვარი ენერგეტიკა", რომელიც იმ დროსაც რუსული სახელმწიფო კომპანია "ინტერ რაო ეესის" საკუთრებაში იყო, იქნა გაშვებული, მას შემდეგ რაც აღმოსავლეთ-დასავლეთის გადამცემი ხაზი იქნა აფეთქებული. კომპანიებმა იმ მომენტში შეასრულეს ყველა ვალდებულება და მათ რომ მათზე დაკისრებული ვალდებულებები, არ შეესრულებინათ იქ შევიდოდა დროებითი ადმინისტრატორი. გამოვრიცხავ, რომ რომელიმე ქვეყანა ენერგეტიკაში გახდეს დომინატი. ამას გამოვრიცხავ არა პირადად მე, არამედ საქართველოს კანონმდებლობა", - აღნიშნა ენერგეტიკისა და ბუნებრივი რესურსების მინისტრმა.
შეგახსენებთ, რომ სულ ცოტა ხნის უკან ცნობილი გახდა, რომ სახელმწიფო საკუთრებაში არსებული სს "ხრამი 1"-სა და "ხრამი 2"-ის აქციათა 100%-ის მფლობელი ჰოლანდიაში რეგისტრირებული Gardabani Holdings B.V. გახდა, რომლის აქტივების 100%-ს რუსეთის სახელმწიფო კომპანია "ინტერ რაო ეესი" მართავს.
"ინტერ რაო" საქართველოში კიდევ ორ ელექტროკომპანიას ფლობს: 600 მეგავატის სიმძლავრის თერმულ ელექტროსადგურს - მტკვარი ენერგეტიკა და საქართველოს უდიდეს ელექტროქსელს - თელასი
