მისიის მიზანია ეკონომიკური და ფინანსური სტატისტიკის სისტემის (საქართველოს სტატისტიკის ეროვნული სამსახური, ფინანსთა სამინისტრო და ეროვნული ბანკი) შეფასება. კერძოდ, სსფ-ის მონაცემთა ხარისხის სტანდარტების დაცვის მდგომარეობის შესწავლა. საერთაშორისო სავალუტო ფონდის წარმომადგენლები გაეცნობიან საქართველოში ეროვნული ანგარიშების, ფასების სტატისტიკის, ფისკალური და მონეტარული სტატისტიკის და საგადასახდელო ბალანსის წარმოების პრაქტიკას და საერთაშორისოდ აღიარებულ სტანდარტებთან მისი შესაბამისობის ხარისხს.

როგორც ცნობილია, მისიის შედეგების მიხედვით მომზადდება მოხსენება, რომელიც განთავსდება სავალუტო ფონდის ოფიციალურ ვებგვერდზე. მოხსენებაში შეფასებული იქნება საქართველოს სტატისტიკური სისტემის მდგომარეობა და მომზადდება სპეციალური რეკომენდაციები.

როგორც დღეს სებ-ში, საერთაშორისო სავალუტო ფონდსა და ქართულ მხარეს შორის გამართული პირველი შეხვედრისას სსფ-ის მუდმივმა წარმომადგენელმა საქართველოში ედუარდ გარდნერმა განაცხადა, სსფ-ს მისია საქართველოში სტატისტიკის წარმოების მეთოდოლოგიას დააკვირდება და საკუთარ ანგარიშში ასახავს იმ ვითარებასა და მეთოდოლოგიას, რაც დღეს სტატისტიკური ინფორმაციის წარმოებისას გამოიყენება.

"საერთაშორისო სავალუტო ფონდი თავის წევრ ქვეყნებს ეხმარება იმაში, რომ არსებობდეს ეფექტური მართველობა და ეკონომიკური ზრდა. ამისათვის კი საჭიროა ქვეყანას ქონდეს სანდო სტატისტიკური მონაცემები. აქედან გამომდინარე სსფ-მ საქართველოში მისია გამოგზავნა, თუ როგორ ხდება ადგილზე სტატისტიკური მონაცემების დამუშავება და რა სტანდარტებს ეფუძნება დადებული სტატისტიკური მასალები და იყენებს თუ არა საქართველო საერთაშორისო სტატისტიკურ სისტემას. მისისს ვიზიტის დასასრულს დადებული იქნება ანგარიში, რომელშიც ასახული იქნება რეალურად იყენებს თუ არა საქართველო საერთაშორისო პრაქტიკას. თუ არ იყენებს, მაშინ მოხდება იმ სფეროების გამოვლენა, სადაც სიტუაცია იქნება გამოსასწორებელი. ნაკლოვანების შემთხვევაში საუბარი იქნება იმ რესურსებეზეც, რომელსაც ესა თუ ის საერთაშორისო ორგანიზაცია გამოყოფს ამ მიმართულებით. სსფ-ს მისია ვერ იტყვის სამომხმარებლო ფასების ინდექსში, რომელიმე მუხლი სწორია თუ პირიქით, მისია დადებს დასკვნას და იტყვის იმას თუ რამდენად ემყარება ეს მეთოდოლოგია, იმ გამჭვირვალე პრინციპებს, რომელიც ამ ინფორმაციის დამუშავებისას უნდა იქნეს გამოყენებული"- აღნიშნა ედუარდ გარდნერმა.
სებ-ის ვიცე-პრეზიდენტის არჩილ მესტვირიშვილს განმარტებით, სტატისტიკის შესახებ სსფ-მ ბოლო ანგარიში 2003 წელს გამოაქვეყნა და გატარებული რეფორმების შემდეგ, ახალი ანგარიში მეტად მნიშვნელოვანი დოკუმენტი იქნება.
"ეს იქნება ძალიან მნიშვნელოვანი ანგარიში. ბოლო შეფასება 2003 წელს გაკეთდა, მას შემდეგ სტატისტიკის წარმოებაში მნიშვნელოვანი რეფორმები გატარდა. მნიშვნელოვნად დაიხვეწა და გაუმჯობესდა სტატისტიკის წარმოება და ჩვენ გვაქვს იმედი, რომ ეს ყველაფერი ასახული იქნება ახალ ანგარიშში, რაც უკეთ წარმოაჩენს საქართველოში სტატისტიკის წარმოებას, ვიდრე ეს 2003 წელს იყო"- განმარტა არჩილ მესტივირიშვილმა.

"ეს არის დაახლოებით 2 კვირიანი ვიზიტი და ძირითადი მიზანი სსფ-ს მისიის საქართველოში ვიზიტისა არის ის, რომ მოხდეს შეფასება საქართველოს ერთიანი სტატისტიკური სისტემის, რომლის შემადგენელი ნაწილი "საქსტატთან" ერთად არის საქართველოს ეროვნულო ბანკი და ფინანსთა სამინისტრო. აქ საუბარია მხოლოდ ფინანსურ და ეკონომიკურ სტატისტიკაზე. 2003 წელის შემდეგ სტატისტიკაში გაუმჯობესება სახეზეა. გასულ წელს საქართველო სსფ-ს სპეციალური სტანდარტის წევრი გახდა. ყველა მეთოდოლოგია, რომელსაც ჩვენ ეკონომიკურ სტატისტიკაში ვიყენებთ, ეს არის ინფლაციის მეთოდოლოგია, ეროვნული ანგარიში, თუ სხვადასხვა ფისკალური და მონეტარული მეთოდოლოგია ძირითადად სსფ-ს მიერ შედგენილი მეთოდოლოგის ეფუძნება. ამიტომ მათთვისაც მნიშვნელოვანია, რომ ადგილზე შეხედონ და დააკვირდნენ სტატისტიკის წარმოებას. ჩვენთვის მნიშვნელოვანი იქნება იმ შეფასებების მოსმენა, რომლებიც ისინი უახლოეს დღეებში დადებენ"- განაცხადა "საქსტატის" აღმასრულებელმა დირექტორმა ზაზა ჭელიძემ.