დღეიდან, 4 ოქტომბრიდან, 17 ოქტომბრის ჩათვლით, საქართველოს საერთაშორისო სავალუტო ფონდის (სსფ) მისია ეწვევა.
მისიის მიზანია ეკონომიკური და ფინანსური სტატისტიკის სისტემის (საქართველოს სტატისტიკის ეროვნული სამსახური, ფინანსთა სამინისტრო და ეროვნული ბანკი) შეფასება. კერძოდ, სსფ-ის მონაცემთა ხარისხის სტანდარტების დაცვის მდგომარეობის შესწავლა. საერთაშორისო სავალუტო ფონდის წარმომადგენლები გაეცნობიან საქართველოში ეროვნული ანგარიშების, ფასების სტატისტიკის, ფისკალური და მონეტარული სტატისტიკის და საგადასახდელო ბალანსის წარმოების პრაქტიკას და საერთაშორისოდ აღიარებულ სტანდარტებთან მისი შესაბამისობის ხარისხს.
მისიის შედეგების მიხედვით მომზადდება მოხსენება, რომელიც განთავსდება სავალუტო ფონდის ოფიციალურ ვებგვერდზე. მოხსენებაში შეფასებული იქნება საქართველოს სტატისტიკური სისტემის მდგომარეობა და მომზადდება სპეციალური რეკომენდაციები.
საერთაშორისო სავალუტო ფონდსა და ქართულ მხარეს შორის პირველი შეხვედრა 4 ოქტომბერს 10:00 საათზე ეროვნული ბანკში შედგება. საერთაშორისო სავალუტო ფონდის დელეგაცია საქართველოს სტატისტიკის ეროვნული სამსახურის, ეროვნული ბანკისა და ფინანსთა სამინისტროს წარმომადგენლებს ერთობლივად შეხვდება.
