საქართველო-სომხეთის საზღვარზე ჩამოწოლილი მეწყერის შედეგად საქართველოს 4 მოქალაქე ამ დრომდე დაკარგულად ითვლება. ამის შესახებ დღეს გამართულ ტრადიციულ ბრიფინგზე საქართველოს საგარეო საქმეთა მინისტრის მოადგილე დავით ჯალაღანიამ განაცხადა. მისი თქმით, საქართველოს საგარეო უწყებისთვის უცნობია მსხვერპლის არსებობს თუ არა.
"ჩვენთვის უცნობია ამ დროისთვის მსხვერპლი არის თუ არა. იმედი გვაქვს, რომ ეს უბედური შემთხვევა მსხვერპლის გარეშე ჩაივლის. ვიცით, რომ არის რამდენიმე სატრანსპორტო საშუალება დაზიანებული. საქართველოს 4 მოქალაქე დაკარგულად ითვლება. სამაშველო სამუშაოები გრძელდება და კიდევ ერთხელ ვიმეორებ, რომ იმედი გვაქვს რომ ყველაფერი მშვიდობიანად დასრულდება. როგორც კი ამ უბედურების შესახებ ჩვენთვის ნაცნობი გახდა, ქართული მხარე დაუკავშირდა სომხურ მხარეს და დახმარების მზადყოფნა გამოთქვა. საქართველო მზადაა სომხეთს სტიქიის შედეგების ლიკვიდაციაში დაეხმაროს " , -განაცხადა ჯალაღანიამ.
შეგახსენებთ, რომ ძლიერი მეწყერის შედეგად საქართველო-სომხეთის საზღვარზე. მიწამ 21 ავტომობილი ჩაიყოლა. მათ შორის 2 ავტომობილი საქართველოს მოქალაქეებს ეკუთვნოდა.
სტიქიის შედეგად 10-მდე ადამიანი დაზარალდა. რამდენიმე ადამიანს ამ დრომდე ეძებენ. დნარჩენებმა მანქანებიდან გადმოსვლა დროულად მოასწრეს და საბედნიეროდ არ დაშავებულან.
შემთხვევის ადგილზე ამ წუთებში რამდენიმე სამაშველო ბრიგადა მუშაობს, მომხდარის გამო მაგისტრალი დროებით გადაიკეტა.