აჭარის ტურიზმისა და კურორტების დეპარტამენტი მომავალი წლის სეზონისთვის სამზადისს იწყებს. დეპარტამენტს მთავრობისთვის კონკრეტული გეგმის წარმოდგენა კი 2012 წლის ბიუჯეტის დამტკიცებამდე დაევალა.
ლევან ვარშალომიძე აჭარის მთავრობის წევრებსა და ბათუმის მერ რობერტ ჩხაიძესთან ერთად ტურიზმის დეპარტამენტში გასული სამი თვის განმავლობაში განხორციელებული საქმიანობის პრეზენტაციას დაესწრო.
დეპარტამენტის ხელმძღვანელმა ვაჟა დიასამიძემ აჭარაში ტურისტების რაოდენობის ზრდაზე გაამახვილა ყურადღება. ასევე, წარმოადგინა ტურისტული პროდუქტები: თემატური რუქები, განახლებული საინფორმაციო ცენტრები და ტურპაკეტები, რომლებითაც მიმდინარე სეზონზე ქალაქის სტუმრები სარგებლობდნენ.
მთავრობის თავმჯდომარემ ვაჟა დიასამიძეს მომავალი წლის სეზონისთვის მზადების დროულად დაწყება და კონკრეტული გეგმის წარმოდგენა 2012 წლის ბიუჯეტის დამტკიცებამდე მოსთხოვა. ლევან ვარშალომიძემ დეპარტამენტის თანამშრომლებს ახალი ტურისტული პროდუქტის შექმნა და არსებული სერვისის გაუმჯობესება დაავალა.
თავმჯდომარემ ასევე აღნიშნა, რომ რეგიონში ტურიზმის განვითარებაზე დეპარტამენტთან ერთად ყველა სამინისტრო და მუნიციპალიტეტი თანაბრად უნდა ზრუნავდეს.
