საქართველოს მთავარი პროკურორის პირველი მოადგილის დავით საყვარელიძის განცხადებით, მალაიზიაში დაკავებული ქართველების დარეჯან კოხტაშვილისა და ბაბუცა გორდაძის საქმის განხილვა ჯერ ჯერობით არ დაწყებულა. ეს განცხადება საყვარელიძემ სააგენტო "ჯი-ეიჩ-ენთან" საუბრისას გააკეთა.
"ბოლო ინფორმაცია რაც მივიღეთ არის ის, რომ მათი საქმე გადაიგზავნა სასამართლოში, მაგრამ საქმის განხილვა ჯერჯერობით არ დაწყებულა. საქმის განხილვის დაწყების ვადები ჩვენთვის უცნობია", _ განაცხადა "ჯი-ეიჩ-ენთან" საუბარში საყვარელიძემ.
შეგახსნებთ, რომ მალაიზიელ კოლეგას უკვე შეხვდა მთავარი პროკურორის პირველი მოადგილე დავით საყვარელიძე. მალაიზიაში იმყოფებოდა იუსტიციისა და საგარეო საქმეთა სამინისტროების დელეგაციაც, რომელმაც საქმის მასალები ადგილობრივ პროკურატურას გადასცა. მათ შორის ბაბუცა გორდაძის ქმრის, ელდარ დავითიანის ქართველი სამართალდამცავებისათვის მიცემული ჩვენება სადაც მან დანაშაული საკუთარ თავზე აიღო. მალაიზიის პრემიერს წერილი გაუგზავნა საქართველოს პრემიერ-მინისტრმაც.
2010 წლის ოქტომბრის ბოლოს დარეჯან კოხტაშვილი და ბაბუცა გორგაძე მალაიზიის ქალაქ მენგატილში დიდი რაოდენობით ნარკოტიკების გადატანის ფაქტზე დააკავეს. ეს ბრალდება ადგილობრივი კანონმდებლობით სიკვდილით დასჯას ითვალისწინებს.
