საქართველოს პროფესიული კავშირების გაერთიანების თავმჯდომარე ირაკლი პეტრიაშვილმა ქუთაისში, შ.პ.ს. "ევრაზიანსთილსის" ქარხანა "ჰერკულესის" წინ გამართულ პრესკონფერენციაზე, ქარხნის მუშების სრულმასშტაბიანი გაფიცვის თარიღი ოფიციალურად დაასახელა - სრულმასშტაბიანი გაფიცვა "ჰერკულესში"13 სექტემბერს დაიწყება. გადაწყვეტილება ამის შესახებ დღეს დილით, საწარმოს თანამშრომლებისა და პროფკავშირების გაერთიანების თავმჯდომარის, მეტალურგიული, სამთო და ქიმიური მრეწველობის მუშაკთა პროფკავშირის ხელმძღვანელის შეხვედრაზე მიიღეს.
შეხვედრაზე, რომელშიც საწარმოს 50 პროფკავშირელი აქტივისტი მონაწილეობდა, დეტალურად იქნა განხილული "ჰერკულესში" არსებული დაძაბული ვითარება, ბოლო დროს განვითარებული მოვლენები, გამაფრთხილებელი გაფიცვის შემდეგ, მუშებზე გაძლიერებული ზეწოლის, შანტაჟისა და მუქარის, გაფიცულების გათავისუფლების ფაქტები.
13 სექტემბერს, 09:00 საათზე შ.პ.ს. "ევრაზიანსთილსის" ქარხანა "ჰერკულესში" დაიწყება სრულმასშტაბიანი გაფიცვა, რომელიც გაგრძელდება იქამდე, ვიდრე საწარმოში დასაქმებული ადამიანების სამართლიანი მოთხოვნები არ დაკმაყოფილდება.
