აჭარის მთავრობამ ციტრუსების, სამკურნალო მცენარეების და ხეხილოვანი ნაყოფების მიმღები პუნქტის მოწყობად ინვესტორი იპოვა. როგორც სააგენტო "ჯი-ეიჩ-ენს" აჭარის ფინანსთა და ეკონომიკის სამინისტროში განუცხადეს, "ქობულეთის სამკურნალო მცენარეების დამზადების გაერთიანების" აჭარის ავტონომიური რესპუბლიკის საკუთრებაში არსებული 80%-იანი წილის მფლობელი ფიზიკური პირი ომარ ქათამაძე გახდა, რომელმაც ობიექტში 83 ათასი ლარი გადაიხადა.
პირობებიანი აუქციონის თანახმად, რომელიც დღეს შედგა, ინვესტორი ვალდებულია, ხელშეკრულების გაფორმებიდან 24 თვის ვადაში შპს "ქობულეთის სამკურნალო მცენარეების დამზადების გაერთიანების" საკუთრებაში არსებულ მიწის ნაკვეთებზე ციტრუსების, სამკურნალო მცენარეების და სხვა ხეხილოვანი ნაყოფების მიმღები პუნქტი მოაწყოს. ასევე 0,8 ჰექტარზე სასათბურე მეურნეობა გააშენოს. პროექტის განსახორციელებლად, ინვესტორს ევალება ასევე არა ნაკლებ 200 000 ლარის ინვესტიციის განხორციელება; საპრივატიზაციო პირობების თანახმად, ხელშეკრულების გაფორმებიდან 24 თვის შემდეგ მომდევნო 5 წლის განმავლობაში საწარმოში არა ნაკლებ საქართველოს 20 მოქალაქის დასაქმება.
მყიდველი ვალდებულია, შესაბამისი ხელშეკრულების გაფორმებიდან არა ნაკლებ 20 წლის განმავლობაში, შპს "ქობულეთის სამკურნალო მცენარეების დამზადების გაერთიანების" საკუთრებაში არსებული სასოფლო-სამეურნეო დანიშნულების მიწის ნაკვეთი გამოიყენოს სასოფლო-სამეურნეო დანიშნულებით და აღნიშნულ ნაკვეთზე ააშენოს მხოლოდ სასოფლო-სამეურნეო საქმიანობისთვის საჭირო შენობა-ნაგებობანი.
აღსანიშნავია, რომ "ქობულეთის სამკურნალო მცენარეების დამზადების გაერთიანებას კრედიტორული დავალიანებაც აქვს. აჭარის ფინანსთა და ეკონომიკის სამინისტროს ინფორმაციით, მას 1907.45 ლარი საბიუჯეტო დავალიანება (რომელსაც ყოველ ვადაგადაცილებულ დღეზე ერიცხება საურავი) და 22 007 ლარი გრძელვადიანი სასესხო ვალდებულება ერიცხება.
