ხვალ, 7 სექტემბერს ”ვინოპოლისი”, ლონდონის ღვინის მუზეუმი ქართული ღვინის საღამოს უმასპინძლებს. ღონისძიება ორგანიზებულია საქართველოს ეროვნული საინვესტიციო სააგენტოს მიერ საქართველოს ეკონომიკისა და მდგრადი განვითარების სამინისტროს პატრონაჟით. საღამოს მხარდამჭერები არიან საქართველოს საელჩო დიდ ბრიტანეთსა და ჩრდილოეთ ირლანდიის გაერთიანებულ სამეფოში და ირლანდიაში, ბრიტანულ-ქართული სავაჭრო პალატა და ”სამტრესტი” (Association Georgian Wine). საქართველოს ეროვნულმა საინვესტიციო სააგენტომ აირჩია ”ვინოპოლისი”, რადგან აღნიშნული ღვინის მუზეუმი ერთ ერთი ყველაზე კოსმოპოლიტური ადგილია და თავს უყრის მსოფლიო ღვინის მწარმოებლებს. სწორედ ”ვინოპოლისში“ აცხადებს საქართველო, რომ იგია ღვინის სამშობლო. ბოლო რამოდენიმე წელია ლონდონის ღვინის მუზეუმს არ წვევია ქართული ღვინის მწარმოებლები და საქართველოს ეროვნული საინვესტიციო სააგენტო იყენებს ამ შანს, რომ კიდევ ერთხელ შეახსენოს მსოფლიოს თუ რა პოტენციალი გააჩნია საქართველოს მაღალი ხარისხის ღვინის ექსპორტის კუთხით. ღვინის საღამოზე მოწვეული არიან ღვინის ექსპერტები, დიდი ბრიტანეთის ალკოჰოლური სასმელების ინდუსტრიის წარმომადგენლები, სამთავრობო სტრუქტურების წარმომადგენლები, ბრიტანეთში სასმელების იმპორტიორი კომპანიები და ტრეიდერები, გადაწყვეტილების მიმღები პირები საცალო და საბითუმო ვაჭრობის ქსელიდან, ბრიტანული მედია. გალა საღამოს გახსნის საქართველოს საგანგებო და სრულუფლებიანი ელჩი დიდი ბრიტანეთსა და ჩრდილოეთ ირლანდიის გაერთიანებულ სამეფოში და ირლანდიაში გიორგი ბადრიძე. სტუმრებს ასევე მიმართავს საქართველოს ეროვნული საინვესტიციო სააგენტოს დირექტორი, ქეთი ბოჭორიშვილი და გააცნობს ქვეყანაში არსებულ საინვესტიციო კლიმატსა და თანამშრომლობის შესაძლებლობებს საერთაშორისო ვაჭრობის კუთხით. ღვინის თემას მიმოიხილავს ”სამტრესტის” ხელმძღვანელი თინა კეზელი და ღვინის ექსპერტები. ქართული ეროვნული ცეკვისა და სიმღერის პარალელურად სტუმრებს ელის სასიამოვნო სიურპრიზი. მოხდება საქართველოს მიმართულებით ავიაბილეთის გათამაშება, რომელიც დააწესა ”აეროსვით” უკრაინის ავიახაზებმა დიდ ბრიტანეთში. გამარჯვებული დაესწრება ” Trade with Georgia 2011, Beverage Tradeshow & B2B Forum ”-ს, რომელიც საქართველოს ეროვნული საინვესტიციო სააგენტოს ორგანიზებით გაიმართება ა.წ ნოემბერში. ეს იქნება სასმელების ინდუსტრიაში უნიკალური ტრეიდშოუ ქართული ალკოჰოლური და არაალკოჰოლური სასმელების მწარმოებელი კომპანიებისათვის რადგან მათ საშუალება მიეცემათ უშუალოდ დაამყარონ კონტაქტი უცხოელ ტრეიდერებთან და დაგეგმონ საკუთარი პროდუქციის ექსპორტი. ღონისძიების საპატიო სტუმარია ლიზა პეროტი-ბრაუნი სინგაპურის ერთადერთი ღვინის მაგისტრი, რომელიც წერს მსოფლიოში ერთერთი ყველაზე ცნობილი, რობერტ პარკერის გამოცემა Wine Advocate-სთვის და ფარავს აზიის რეგიონს. არის მადამ ბოლინგერის ჯილდოს მფლობელი.