სტამბულის შემდეგ, ქართული ღვინოების კუთხეები, "ტავ ჰოლდინგის" მიერ ოპერირებად, ანკარისა და იზმირის საერთაშორისო აეროპორტებშიც გაიხსნა, ამის შესახებ სააგენტო "ჯი-ეიჩ-ენს" "ტავ ჰოლდინგიდან" აცნობეს.
ამიერიდან, ანკარისა და იზმირის აეროპოტების ჩამოფრენისა და გამგზავრების Duty Free - ის მაღაზიებში ქართული ღვინის დახვეწილი კოლექცია გაიყიდება, რომლის შეძენის შესაძლებლობა მილიონობით მგზავრს მიეცემა.
ესპანური და ფრანგული ღვინოების გვერდით მაღაზიებში წარმოდგენილია ღვინის მწარმოებელი რამდენიმე ქართული კომპანიის მრავალი დასახელების საუკეთესო ღვინო. ქართული ღვინის გამოჩენა ანკარისა და იზმირის აეროპორტებში არამარტო ქართული ღვინის პოპულარიზაციას შეუწყობს ხელს, არამედ ეროვნული ღვინის პროდუქციას შესაძლებლობას მისცემს ცნობადობა გააფართოოს და საერთაშორისო ბაზარზე პოზიცია გაიმყაროს.
შეგახსენებთ, რომ მიმდინარე წლის 15 აგვისტოს სტამბულის საერთაშორისო აეროპორტის Duty Free- ის მაღაზიებშიც გაიხსნა ქართული ღვინის კუთხეები.
